Հասարակություն
06.05.2017 | 13:48
Ռուսական 102-րդ ռազմաբազայի զինծառայող, Ավետիսյանների ընտանիքի անդամների սպանության մեղադրանքով ՀՀ-ում պատիժը կրող Վալերի Պերմյակովի արտահանձման որոշումից հետո Ավետիսյանների իրավահաջորդները կդիմեն ՄԻԵԴ։ Ավետիսյանների ընտանիքի իրավահաջորդներից՝ Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը վստահ է, որ ՄԻԵԴ-ը բավարարելու է իրենց դիմումը։
Այս մասին Factor.am-ի հետ զրույցում ասաց Արթուր Սաքունցը․ «Միանշանակ է, որ մարդու իրավունքների եվրոպական դատարանը մեր նշած փաստական հանգամանքների հիման վրա ճանաչելու է Հայաստանի Հանրապետությանը պատասխանատու իր քաղաքացիների կյանքի իրավունքի պաշտպանության հարցում ոչ պատշաճ ջանքեր գործադրելու համար, որովհետև պետությունը պոզիտիվ պարտականություն ունի իր սպանված քաղաքացիների մահվան փաստով արդյունավետ քննություն անցկացնելու և մեղավորներին բացահայտելու հարցում»։
Սաքունցի համոզմամբ՝ մեղավոր պետք է ճանաչվի նաև ՌԴ-ն, որի ռազմաբազայի զինծառայողի կողմից էլ «ՀՀ քաղաքացիների կյանքի իրավունքը խախտվել է»։
«Ռուսական կողմը խախտել է այդ իրավունքը, հայկական կողմն էլ այդ խախտման փաստով պատշաճ քննություն չի իրականացրել։ Ավելին՝ ինձ համար հարցեր կան Ավետիսյանների ընտանիքի մյուս անդամների իրավահաջորդների ներկայացուցիչների պահվածքի հետ կապված»,- ասաց նա։
Թեմայի վերաբերյալ Արթուր Սաքունցի հետ հարցազրույցը՝ առաջիկայում։
