12.07.2026 | 17:02
Ալեն Սիմոնյանը մինչև նոր ԱԺ-ի ձևավորումը արձակուրդում կգտնվի․ նա պարգևատրման մասին որոշում է ստորագրել
Դեսպան Փոլադյանի հանդիպումն Իրաքի առևտրի նախարարի հետ
Քաղաքականություն
14.03.2019 | 15:42
Մարտի 13-ին Իրաքում ՀՀ դեսպան Հրաչյա Փոլադյանը հանդիպեց Իրաքի առևտրի նախարար Մոհամեդ Հաշիմ Աբդուլ Մաջիդին (Mohammed Hashim Abdul Majeed)։ Ողջունելով դեսպան Փոլադյանին՝ նախարար Աբդուլ Մաջիդը նշեց, որ ներկայումս բավական բարենպաստ պայմաններ են ստեղծվել առևտրատնտեսական ծավալներում փոխադարձ առաջընթաց գրանցելու ուղղությամբ։ Ինչպես տեղեկացնում են ԱԳՆ լրատվական ծառայությունից, կողմերն անդրադարձան հայ-իրաքյան երկկողմ հարաբերություններում առևտրի բնագավառում առկա համագործակցության հեռանկարներին՝ մատնանշելով, որ այդ նպատակն իրագործելու համար խիստ կարևոր է գործարարների համաժողովներին և փոխադարձաբար տնտեսական ուղղվածություն ունեցող ցուցահանդեսներին մասնակցությունը։
Նախարար Աբդուլ Մաջիդը, մասնավորապես ընդգծեց հայկական ընկերությունների՝ հոկտեմբերին կայանալիք Բաղդադի միջազգային տնտեսական ցուցահանդեսին մասնակցելու կարևորությունը։ Արձանագրվեց, որ առկա է մեծ ներուժ առևտրի ծավալներն ավելացնելու համար՝ հատկապես ապագայում Հայաստանից դեպի Իրաք ուղղությամբ ցամաքային ճանապարհի բացման պարագայում։
Հանդիպման ընթացքում կողմերը պայմանավորվեցին պատշաճ կերպով նախապատրաստվել նաև տարեվերջին տեղի ունենալիք Հայ-իրաքյան միջկառավարական հանձնաժողովի 3-րդ նիստի աշխատանքներին՝ վերանայելով նաև համապատասխան իրավապայմանագրային երկկողմ փաստաթղթերը։
