16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Նիկոլ Փաշինյանը գազի գնի իջեցման հույս ունի. ՀՀ վարչապետի հարցազրույցը РБК-ին․ ՏԵՍԱՆՅՈՒԹ
Տնտեսություն
29.01.2019 | 16:09
«Գազպրոմ»-ի հետ պայմանավորվել ենք, որ առնվազն 2019 թվականին Հայաստանի սպառողների համար գազի գինը չի փոխվի: ՌԲԿ-ին տված հարցազրույցում այս մասին ասել է ՀՀ վարչապետ Նիկոլ Փաշինյանը:
«ԵՏՄ տարածքում գազի գինն անչափ զգայուն հարցերից է: Պայմանավորվել ենք, որ առնվազն 2019թ. Հայաստանի սպառողների համար գազի գինը չի փոխվի: Այս տարվա ընթացքում մենք կշարունակենք քննարկումները՝ գազի սակագնի հարցում համաձայնության հասնելու համար»,- նշել է Փաշինյանը:
Լրագրողի ճշտող հարցին, թե տարեվերջին, հնարավոր է, Հայաստանում նույնպես գազի գինը կբարձրանա, ՀՀ վարչապետը պատասխանել. «Իսկ ինչո՞ւ եք այդպես կարծում: Ես հույս ունեմ, որ հակառակը՝ կիջնի»: Հիշեցնենք, որ անցյալ տարեվերջին ռուսական «Գազպրոմ» ընկերությունը հայտարարեց, որ իր դուստր ձեռնարկություն «Գազպրոմ Արմենիա»-ն գազը կգնի 1.000 խորանարդ մետրը 165 դոլարով՝ նախկին 150 դոլարի փոխարեն:
Ինչ վերաբերում է Ռուսաստանից էներգետիկ կախվածությանը. լրագրողի հարցին՝ արդյո՞ք Հայաստանը ծրագրում է միանալ այն երկրներին, որոնք հանդես են գալիս Ռուսաստանից այդ կախվածությունը նվազեցնելու օգտին և «Հյուսիսային հոսք 2»-ի նման նախագծերը դիտարկում են որպես սեփական անվտանգությանը սպառնալիք, Փաշինյանը պատասխանել է. «Ցավոք՝ հիմա Հայաստանում «Հյուսիսային հոսք 2» չի կառուցվում: Մենք շահագրգռված ենք, որ մեր երկրում նույնպես կառուցվի որևէ տարանցիկ խողովակաշար, որը, օրինակ, գազ կամ նավթ կփոխադրեր Ա կետից Բ կետ: Այդ պատճառով, մենք շատ ենք հետաքրքրված նման նախագծերով»:
