Ո՞րն է բենզինի էժանացման պատճառը և արդյոք գնանկումը շարունակակա՞ն կլինի. ՏԵՍԱՆՅՈՒԹ

Նախորդ՝ 2018թ-ի հունվարի 1-ից 10-15 տոկոսով բարձրացել էին բենզինի, դիզվառելիքի գները: Այս տարի, սակայն, հուրախություն վարորդների, բենզինի շուկայում հակառակ փոփոխությունը գրանցվեց։ Եթե մոտ մեկ տարի առաջ, օրինակ, Regular տեսակի բենզինն արժեր 430-450 դրամ, ապա այժմ արդեն մեկ ամսվա մեջ բենզինի և դիզվառելիքի գինն անկում է ապրել․ «450-ից դարձել ա 400 դրամ, էժանացման պատճառը չգիտեմ, թե ինչն է»,- Factor.am-ի հետ զրույցում ասաց բենզալցակայանի աշխատակիցներից մեկը։

Factor․am-ը երևանյան բենզալցակայաններում փոքրիկ շրջայց կատարեց և պարզեց, որ բենզինի Regular տեսակի գինը կազմում է 400-410, Premium տեսակի և դիազվառելիքի գինն էլ 420-430 դրամ։ Նախկինի համեմատ 40-50 դրամով էժան:

Տնտեսական մրցակցության պաշտպանության պետական հանձնաժողովից Factor.am-ին փոխանցեցին, որ իրենք ոչ աշխատանքային օրերին էլ են մոնիթորինգ իրականացրել, բայց բենզինի և դիզվառելիքի գների փոփոխության պատճառների հետ կապված դեռևս տեղեկություն փոխանցել չեն կարող։ ՏՄՊՊՀ-ից հայտարարությամբ հանդես կգան առաջիկա օրերին։

Մինչ ՏՄՊՊՀ-ն պատասխան չունի, տնտեսագետ, «Իմ քայը» դաշինքով ԱԺ պատգամավոր ընտրված Արտակ Մանուկյանը չի բացառում, որ գնանկումը կարող է կապված լինել շուկայում առկա մրցակցության և տնտեսվարողների ախորժակի նվազման հետ։ Վարորդները ևս մեզ հետ զրույցում դժվարանում էին ասել, թե ինչի հետ կարող է կապված լինել գնանկումը, բայց հույս ունեն, որ այն կշարունակվի։

Մանրամասները՝ տեսանյութում։

Լիլիթ Շաբոյան