Ձեզ սխալ են զեկուցում, կարդացեք փաստաթղթերը. Բաբկեն Պիպոյանը՝ քաղաքապետ Հայկ Մարությանին. ՏԵՍԱՆՅՈՒԹ

«Իրազեկ և պաշտպանված սպառող» ՀԿ նախագահ Բաբկեն Պիպոյանը կարծում է՝ Երևանի քաղաքապետին սխալ են զեկուցում մայրաքաղաքի տրանսպորտային խնդիրների մասին:

Պիպոյանը Հայկ Մարությանին խորհուրդ է տալիս պարզապես կարդալ իրեն փոխանցվող փաստաթղթերը: Երևանի տրանսպորտի արդիականացման հետաձգման, ոլորտում բարեփոխումների իրականացման հնարավոր ժամկետների և այս հարցում քաղաքապետարանի դիրքորոշման մեջ բացերի թեմայով լրագրողների հետ զրույցում Բաբկեն Պիպոյանը հույս հայտնեց, որ «քաղաքապետի բոլոր հայտարարությունները գալիս են նրանից, որ իրեն սխալ են զեկուցում ներսում»:

«Անկեղծ լիահույս եմ, որ քաղաքապետի բոլոր հայտարարությունները գալիս են նրանից, որ իրեն սխալ են զեկուցում ներսում: Եվ այն տեղեկությունները, որոնք նա փոխանցում է հանրությանը, իրականում ոչ թե միտումնավոր են, այլ սխալ տեղեկացվածության և սխալ զեկուցելու արդյունք»,- հավելեց նա:

Փորձագետը վստահ չէ, որ շատերն են ամբողջությամբ կարդացել Երևանի տրանսպորտային ցանցի արդիականացման վերաբերյալ միջազգային խորհրդատուի տրամադրած հաշվետվությունը, հասկացել ու վերլուծել են այն:

«Միջազգային խորհրդատուն արդեն ուսումնասիրություններն ու հաշվարկներն արել է և հաշվետվություն հրապարակել: Այն ունի Երևանի քաղաքապետարանը: Ես խոսքս ուղղում եմ քաղաքապետին. Ձեզ սխալ են զեկուցում, պարզապես պետք է կարդաք Ձեր ձեռքի տակ եղած փաստաթղթերը»,- հայտարարեց Բաբկեն Պիպոյանը:

Մանրամասները՝ տեսանյութում