23.04.2026 | 14:00
10 մլն դրամանոց ժամացույց, կանխիկ՝ 200 հազար դոլար, 100 մլն դրամ, 50 հազար եվրո, 6 անշարժ գույք․ Դավիթ Ղազինյանի հայտարարագիրը
ԱՄՆ պետքարտուղարությունը նախազգուշացրել է Բարսելոնայում հնարավոր ահաբեկչության մասին
Քաղաքականություն
24.12.2018 | 11:58
ԱՄՆ պետքարտուղարությունը նախազգուշացրել է կատալոնական Բարսելոնայում հնարավոր ահաբեկչության մասին: Գերատեսչությունն Ամանորին և Սուրբ Ծննդին Բարսելոնա ուղևորություն ծրագրող ամերիկացիներին խորհուրդ է տվել առավելագույնս զգույշ լինել քաղաքի կենտրոնական Ռամբլա բուլվարի շրջան այցելելիս: Այս մասին գրում է rbc.ru-ն ՝վկայակոչելով պետքարտուղարության Twitter-ում հրապարակված հաղորդագրությունը:
Կատալոնական ոստիկանությունն արդեն հետախուզում է հայտարարել հստակ կասկածյալի նկատմամբ: El Pais պարբերականի հաղորդմամբ՝ խոսքը 30-ամյա մարոկկացու մասին է, որը վերջին տարիներին բազմիցս Իսպանիա է ժամանել: Ոստիկանությունը ստուգումներ է իրականացնում ինչպես Բարսելոնայի կենտրոնում, այնպես էլ ինքնավարության տարածք մուտք գործող ավտոբուսներում և միկրոավտոբուսներում, ուսումնասիրում է հյուրանոցներում իջևանած և ավտոմեքենա վարձակալած անձանց ցուցակները:
Իրավապահներն առայժմ որևէ ապացույց չունեն, որ կասկածյալն Իսպանիայի տարածքում է: Ամեն դեպքում, Բարսելոնայի կենտրոնում ոստիկանությունն ուժեր է կենտրոնացրել: Հատուկ ստորաբաժանումները տոների ընթացքում կանոնավորապես ստուգումներ կիրականացնեն զբոսաշրջիկների շրջանում հայտնի տեսարժան վայրերում:
Իսպանիայի իշխանությունները դեռևս երկու շաբաթ առաջ բարձրացրել են ահաբեկչության սպառնալիքի մակարդակը՝ այն հասցնելով 4-ի՝ 5 բալանոց սանդղակի: Հատուկ ռեժիմը կգործի մինչև հունվարի 8-ը:
