Քաղաքականություն
20.12.2018 | 11:32
ԱՄՆ նախագահ Դոնալդ Թրամփի հրահանգով ամերիկյան զորքերը սկսել են դուրս բերել Սիրիայից: Այս մասին գրում է Gazeta-ն՝ վկայակոչելով Reuters-ին:
Սպիտակ տան խոսնակ Սառա Սանդերսն ասել է, որ ամերիկյան զորքերի վերադարձը հայրենիք չի նշանակում Սիրիայում ահաբեկչության դեմ պայքարի ավարտ, պարզապես ԱՄՆ-ն անցնում է այդ արշավի հաջորդ փուլին:
«Սիրիայում «Իսլամական պետության» դեմ տարած հաղթանակները չեն նշանակում Գլոբալ կոալիցիայի գործողությունների կամ նրա արշավի ավարտ»,- ասել է Սանդերսը:
Մի խումբ սենատորներ, սակայն, համաձայն չեն Թրամփի որոշման հետ: Քաղաքական երկու կուսակցությունները ներկայացնող օրենսդիրները նամակ են գրել Սպիտակ տան ղեկավարին՝ կոչ անելով հրաժարվել այդ որոշումից:
Սենատորները ենթադրում են, որ այդ քայլը կհանգեցնի տարածաշրջանում Ռուսաստանի և Իրանի դիրքերի ամրապնդմանը, ինչպես նաև շահեկան կլինի «Իսլամական պետության» համար:
«Եթե որոշեք շարունակել իրականացնել Սիրիայից զորքերի դուրսբերման Ձեր որոշումը, Սիրիայում գոյություն ունեցող ԻՊ-ի ցանկացած մնացորդ անկասկած կվերականգնվի և կուժեղացնի գործունեությունը տարածաշրջանում»,- նշել են սենատորները:
