22.06.2026 | 15:10
Գյումրի-Մոսկվա չվերթի օդանավի արտակարգ վայրէջքը Դաղստանում // ՀՀ-ն Ադրբեջանի տարածքով ինտերնետ կստանա․ ԼՈՒՐԵՐ
Բելգիայի վարչապետը հրաժարական է ներկայացրել. թագավորը խորհրդակցություններ կանցկացնի քաղաքական ուժերի հետ
Քաղաքականություն
19.12.2018 | 14:35
Բելգիայի Ֆիլիպ թագավորն ընդունել է դեկտեմբերի 18-ին հրաժարական ներկայացրած վարչապետ Շառլ Միշելին, սակայն հետաձգել է նախարարների կաբինետի հրաժարականի հարցով վերջնական որոշման կայացումը: ՏԱՍՍ-ի փոխանցմամբ՝ այս մասին ասված է Թագավորական պալատի տարածած հաղորդագրությունում:
Բելգիական քաղաքական ավանդույթի համաձայն՝ միապետը վերջնական որոշում կայացնելուց առաջ նախ պետք է խորհրդակցություններ անցկացնի թագավորության առաջատար կուսակցությունների հետ:
Իսկ Շառլ Միշելը հրաժարականի մասին հայտարարել է իշխող կոալիցիայի փլուզումից հետո: Այդ մասին վարչապետը հայտարարել է խորհրդարանի նիստում, որի ընթացքում կուսակցությունները պահանջել են կառավարությանն անվստահություն հայտնելու հարցով քվեարկություն անցկացնել:
Բելգիայում կառավարական ճգնաժամը սկսվել է դեկտեմբերին, միգրացիայի հարցով ՄԱԿ-ի գլոբալ համաձայնագրի հարցով իշխող կոալիցիայում լուրջ տարաձայնությունների պատճառով: Դեկտեմբերի 9-ին կոալիցիան վերջնականապես փլուզվեց, երբ կառավարությունից դուրս գալու մասին հայտարարեց «Նոր Ֆլամանդական ալյանսը»:
Խորհրդարանի նիստում Շառլ Միշելը հույս ուներ ստանալ մյուս կուսակցությունների աջակցությունը, սակայն ո՛չ սոցիալիստները, ո՛չ կանաչները չսատարեցին նրան: Օրենսդրության համաձայն՝ հիմա Բելգիայում 40-օրյա ժամկետում պետք է արտահերթ ընտրություններ անցկացվեն, սակայն թագավորի հետ խորհրդակցություններից հետո կարող է կառավարության գործունեության տեխնիկական երկարաձգման որոշում կայացվել՝ մինչև ծրագրված հերթական ընտրությունները:
