17.12.2025 | 23:55
ՊՍԺ-ն՝ Միջմայրցամաքային գավաթի հաղթող․ ՏԵՍԱՆՅՈՒԹ
Մենք հիբրիդային պատերազմի ժամանակներում ենք, որտեղ մեր թշնամիներն աշխատում են մեր դեմ. Թևան Պողոսյան. ՏԵՍԱՆՅՈՒԹ
Քաղաքականություն
18.12.2018 | 12:39
Մենք հիմա հիբրիդային պատերազմի ժամանակներում ենք, որտեղ մեր թշնամիներն աշխատում են մեր դեմ: Դեկտեմբերի 18-ին լրագրողների հետ հանդիպմանը նման կարծիք հայտնեց «Մարդկային զարգացման կենտրոնի» նախագահ Թևան Պողոսյանը:
«Իմ պատկերացմամբ՝ մենք հիմա հիբրիդային պատերազմի ժամանակներում ենք գտնվում, որտեղ ցանկացածը փորձում է տեղեկատվությունն օգտագործել որպես զենք և Հայաստանի ներսում սերմանել այնպիսի հոգեվիճակ, մեր ընկալումներում ձևավորել այնպիսի մտայնություն, որ մեզ թվա, թե բոլոր կողմերից ճնշումներ են, նույնիսկ մեր իշխանություններն են փորձում զիջումների գնալ»,- հավելեց Թևան Պողոսյանը:
Նրա կարծիքով՝ մենք պետք է առաջնորդվենք մեր տեղեկություններով, և արագորեն չտարածենք այլ աղբյուրներից ստացված լուրերը: Որպես օրինակ նա նշեց Արցախի հակամարտության կարգավորման հարցով պարբերաբար հրապարակվող տեղեկությունները: «Աշխարհով մեկ բոլորն ինչ-որ հույսեր են հայտնում, որ շուտով՝ 2019 թվականին, Արցախի հարցում բեկում կարող է լինել: Դրանք իրենց երկրների շահերն են: Մենք մեր շահերով պետք է առաջնորդվենք»,- հավելեց Թևան Պողոսյանը:
Անդրադառնալով Գյումրիում ռուս զինծառայողի կողմից 57-ամյա հայ կնոջը սպանելու դեպքին՝ Թևան Պողոսյանը նշեց, որ ցանկացած այլ երկրի ռազմական բազա ունեցող երկրներում նմանատիպ դեպքեր լինում են. «Գլխավոր խնդիրը, որ դրանից դասեր պետք է քաղել և հասկանալ, թե ինչ պետք է ձեռնարկել՝ նմանատիպ դեպքերից խուսափելու համար: Այդ զինծառայողը, բնականաբար, պետք է անցնի դատական բոլոր գործընթացներն ու պատիժը կրի: Բայց դա մի կողմ դնելով՝ պետք է հասկանանք, թե ինչ պետք է անել: Ես կառաջարկեի, որ Հայաստանի և Ռուսաստանի իշխանությունները փորձեն հասկանալ, թե ինչ լուծումներ կարող են գտնել, որպեսզի ռուս զինծառայողների նկատմամբ վերահսկողությունն ավելի լինի. գուցե առանձնացված շենքեր կառուցվեն՝ զինվորական ավանի նման, որ նախկինում եղել են»:
Մանրամասները՝ տեսանյութում:
