09.08.2026 | 00:05
Էդգար Սևիկյանը խաղացել է Մադրիդի «Ռեալի» դեմ. ՏԵՍԱՆՅՈՒԹ
«Սերժ Սարգսյանը հրաժարվեց հանձնել 5 շրջանները». Ալեքսանդր Լուկաշենկո
Քաղաքականություն
14.12.2018 | 18:19
Բելառուսի նախագահ Ալեքսանդր Լուկաշենկոն դեկտեմբերի 14-ին ռուսական լրատվամիջոցների հետ հանդիպմանը խոսել է ղարաբաղյան հակամարտության կարգավորմանը Ռուսաստանի և Բելառուսի մասնակցության առաջարկների մասին: ԲԵԼՏԱ-ի փոխանցմամբ՝ նա նշել է, որ այդ հարցը քննարկվել է Երևանում ՀԱՊԿ գագաթնաժողովներից մեկի ժամանակ, երբ Սերժ Սարգսյանը Հայաստանի նախագահն էր:
Լուկաշենկոն պատմել է, որ Հայաստանի և Ադրբեջանի առաջնորդներին կոչ է արել փոխզիջումային լուծումներ գտնել ու կարգավորել խնդիրը: Միաժամանակ, նրա խոսքով, Բելառուսն ու Ռուսաստանը խոստացել են, անհրաժեշտության դեպքում, զորք ուղարկել՝ որոշակի երաշխիքներ ապահովելու համար:
«Հետո արդեն բացահայտորեն ասացի. լսի՛ր, ինչպես իրենք են ասում՝ 7 շրջան է օկուպացվել: Եվ մենք Պուտինի հետ կոնսոլիդացված դիրքորոշում զբաղեցրինք. Սե՛րժ, վերադարձրու այդ 5 շրջանները: Ո՞րն է դրանք չվերադարձնելու պատճառը, չէ՞ որ դրանք դատարկ են: Նա ասաց. եթե ես վերադարձնեմ, նրանք կբռնազավթեն Ղարաբաղը: Մենք Պուտինի հետ հստակ խոստացանք, որ կուղարկենք մեր զորքերը, և դա թույլ չենք տա (ադրբեջանցիների ներկայությամբ ենք դա ասել): Նա ասաց. ո՛չ, մենք դրան չենք գնա, չենք ուզում»,- պատմել է Ալեքսանդր Լուկաշենկոն:
Այս պատասխանը Բելառուսի նախագահին զարմացրել է. «Ինչո՞ւ չեն ուզում: 5 շրջանները դատարկ են: Դա առաջին քայլն է: Այդ դեպքում և՛ Ադրբեջանը, և՛ Հայաստանը կլինեին և՛ ՀԱՊԿ-ում, և՛ Եվրազեսում»:
Լուկաշենկոն նաև ընդգծել է հակամարտության խաղաղ կարգավորման անհրաժեշտությունը, այդ թվում՝ օտարերկրյա ներդրումներ ներգրավելու համար: Այս համատեքստում նա խոսել է Ադրբեջանից Վրաստան խողովակաշարի անցկացման՝ չկայացած նախագծի մասին. «Նրանք խողովակաշար էին անցկացնում: Կարծում եմ՝ գազի: Եվ այն շրջանցեց Հայաստանը»:
