Սպիտակ տունը պաշտոնանկ է արել կիբերանվտանգության ծառայության տնօրեին՝ համակարգերում լայնածավալ խափանումների պատճառով
Քաղաքականություն
20.11.2026 | 14:12
Սպիտակ տան ազգային կիբերանվտանգության ծառայության տնօրեն Շոն Քերնքրոսը պաշտոնանկ է արվել։ Այս մասին հայտնել է Սպիտակ տանը մոտ կանգնած աղբյուրը։ Որոշումը կայացվել է ԱՄՆ-ի ավիափոխադրումների, բանկային համակարգի և ազգային անվտանգության համակարգերում տեխնոլոգիական խափանումներից մի քանի օր անց, գրում է France 24-ը։
Քերնքրոսը պատասխանատու էր դաշնային կառավարության ամբողջ համակարգում կիբերանվտանգության քաղաքականության և ռազմավարության վերահսկման համար։
Աղբյուրի փոխանցմամբ՝ այդ պաշտոնում ժամանակավորապես նրան կփոխարինի ԱՄՆ պատերազմի նախարարության տեղեկատվական տեխնոլոգիաների գլխավոր պատասխանատու Քիրստեն Դեյվիսը։
«Նախագահը լիովին աջակցել է Շոն Քերնքրոսին պաշտոնից ազատելու որոշմանը»,- հայտարարել է անանուն մնալու պայմանով զրուցած աղբյուրը։
Քերնքրոսը հրաժարվել է մեկնաբանել պաշտոնից հեռանալու հանգամանքները։
Վերջին մեկ շաբաթվա ընթացքում ԱՄՆ-ում պարբերաբար տեղի են ունեցել տեխնոլոգիական խափանումներ, այդ թվում՝ ավիահաղորդակցության համազգային դադար, Microsoft-ի խափանում, որն ազդել է էլեկտրոնային փոստի ծառայությունների վրա, ինչպես նաև ԱՄՆ Ազգային անվտանգության գործակալության ցանցի աշխատանքի ժամանակավոր խափանում։
ԱՄՆ հետախուզական ծառայության բարձրաստիճան պաշտոնյան չորեքշաբթի հայտարարել էր, որ վերջին շաբաթվա ընթացքում կարևորագույն համակարգերում տեղի ունեցած խնդիրները միմյանց հետ կապ չունեցող ծառայությունների աշխատանքի խափանումներ են եղել՝ պայմանավորված սպասարկման աշխատանքներով և տեխնիկական փոփոխություններով, այլ ոչ թե համակարգված կամ որևէ պետության հովանավորությամբ իրականացված հարձակում։
Մինչ կիբերանվտանգության ծառայության տնօրենի պաշտոնը ստանձնելը՝ Քերնքրոսը ղեկավար պաշտոն է զբաղեցրել Հանրապետական ազգային կոմիտեում։ Նրա իրավահաջորդի նշանակումը պետք է հաստատի ԱՄՆ Սենատը, որտեղ հունվարից մեծամասնություն կկազմեն դեմոկրատները։
Թարգմանությունը՝ Էմմա Չոբանյանի

