Թրամփը նիրհել է ԱԽՏՀ գագաթնաժողովում Սի Ցզինպինի ելույթի ժամանակ․ ՏԵՍԱՆՅՈՒԹ
Քաղաքականություն
19.11.2026 | 12:50
ԱՄՆ նախագահ Դոնալդ Թրամփը Ասիա-խաղաղօվկիանոսյան տնտեսական համագործակցության (ԱԽՏՀ) լիագումար նիստի ժամանակ նիրհել է։ Նման ենթադրությունների պատճառ է դարձել տեսանյութը, որում երևում է, թե ինչպես է նա փակում աչքերը, երբ ելույթ է ունենում Չինաստանի առաջնորդ Սի Ցզինպինը, գրում է Newsweek-ը։
Երբ Սին կլոր սեղանի շուրջ խոսում էր ազատ և բաց առևտրի կարևորության մասին, տեսախցիկը ցույց է տվել ԱՄՆ նախագահին, որը շուրջ 10 վայրկյան աչքերը փակ է պահել։
Չինաստանի կենտրոնական հեռուստատեսության (CCTV) տեսանյութը լայնորեն տարածվել է սոցիալական ցանցերում։
Թրամփը, որը հունիսին դարձել է 80 տարեկան և պաշտոնը ստանձնած ամենատարեց նախագահն է, երկար ժամանակ հայտնվել է իր տարիքի վերաբերյալ հարցադրումների կենտրոնում։ Պատճառը լայնորեն լուսաբանված մի շարք դեպքերն են, երբ հանրային միջոցառումների ժամանակ նա, ըստ դիտորդների, կարճ ժամանակով նիրհել է։
Մինչդեռ նա մշտապես կտրականապես հերքել է, թե հանրային միջոցառումների ժամանակ քնում է։ Հունվարին անդրադառնալով այդ պնդումներին՝ Թրամփն ասել է, որ հանդիպումները համարում է «հանգստացնող», իսկ փակ աչքերը բացատրել է նրանով, որ պարզապես «թարթում է»։
Թարգմանությունը՝ Էմմա Չոբանյանի

