Նազարբաևը Բելառուսի ԱԽ պետքարտուղարին իր աջակցությունն է հայտնել ՀԱՊԿ գլխավոր քարտուղարի պաշտոնի համար պայքարում

Ղազախստանի նախագահ Նուրսուլթան Նազարբաևն Աստանայում Բելառուսի Անվտանգության խորհրդի պետքարտուղար Ստանիսլավ Զասի հետ հանդիպմանն իր աջակցությունն է հայտնել նրան՝ ՀԱՊԿ գլխավոր քարտուղարի պաշտոնի համար պայքարում: ՌԻԱ Նովոստիի փոխանցմամբ՝ այս մասին տեղեկացնում է Ղազախստանի նախագահի մամուլի ծառայությունը:

«Սանկտ Պետերբուրգում պետությունների ղեկավարները որոշեցին պաշտպանել Ձեր թեկնածությունը: Դուք արդեն սկսել եք հանդիպել կազմակերպության անդամ երկրների ղեկավարների հետ: Արդեն եղել եք Բիշքեկում: Հուսով եմ՝ Ձեր հանդիպումները լավ են անցել»,- ասել է Ղազախստանի նախագահը:

Նազարբաևը կարծում է, որ Զասն անհրաժեշտ հմտություններն ունի՝ այդ պաշտոնում աշխատելու համար: «Դուք զինվորական եք, համապատասխան կրթություն ունեք: Աշխատել եք Գլխավոր շտաբում, Բելառուսի Անվտանգության խորհրդում, ծանոթ եք ՀԱՊԿ-ի աշխատանքին, մասնակցել եք տարատեսակ հանդիպումների և խորհրդակցությունների: Մենք կսատարենք Ձեզ»,- հավելել է Նազարբաևը:

Նշենք, որ Յուրի Խաչատուրովի հետկանչից հետո ՀԱՊԿ գլխավոր քարտուղարի պաշտոնը, այսպես ասած, կռվախնձոր է դարձել կազմակերպության անդամ պետություններից Հայաստանի և Բելառուսի միջև: Պաշտոնական Երևանը ցանկանում է այդ պաշտոնում տեսնել Հայաստանի ներկայացուցչին, քանի որ ավելի քան մեկ տարի այդ պաշտոնը պետք է զբաղեցնի Հայաստանի ներկայացուցիչը: Մինչդեռ Մինսկը պնդում է, որ գլխավոր քարտուղարի թեկնածու առաջադրելու իրավունքն արդեն Բելառուսինն է: