UFC-ի թեթև քաշային կարգի դասակարգման երկրորդ համար Արման Ծառուկյանն անդրադարձել է ռուսաստանցի մարտիկ Ուսման Նուրմագոմեդովի ու թիմակիցների հարձակմանը UFC-ի նախկին չեմպիոն, վրացի Մերաբ Դվալիշվիլիի վրա։
«Դա անխուսափելի էր։ Պատասխանը պետք է լիներ, և դա տեղի ունեցավ։ Սակայն կարծում եմ, որ Ուսմանը չէր ցանկանում կռվել։ Նա ուզում էր նույնպես ապտակել նրան։ Նա կարծում էր, որ դա կլինի վերջը, բայց Մերաբը գազան է և անմիջապես հարձակվեց։
Ըստ իս՝ շարունակություն պետք է չլինի։ Նրանք պարզապես պետք է միասին նստեն և ձեռք սեղմեն, քանի որ, այսպես ասած, քվիտ են»,- Ադամ Զուբայրաևի յութուբյան ալիքի եթերում ասել է հայ մարտիկը։
Հիշեցնենք, որ սկանդալային միջադեպը տեղի էր ունեցել Աբու Դաբիի հյուրանոցներից մեկում: Մերաբ Դվալիշվիլին ԱՄԷ էր ժամանել Real American Freestyle (RAF) ազատ ոճի ըմբշամարտի հերթական լիգայի մրցաշարին մասնակցելու համար: Երբ վրացի մարտիկը հարցազրույց էր տալիս RAF-ի մամուլի ծառայությանը, Նուրմագոմեդովն իր թիմակիցների հետ հարձակվել էին նրա վրա:
Դավիթ Եղիազարյան
