Պեսկովը հայտարարել է, որ Երևանը փաստացի չի մասնակցում ՀԱՊԿ աշխատանքներին

Հայաստանը փաստացի չի մասնակցում Հավաքական անվտանգության պայմանագրի կազմակերպության (ՀԱՊԿ) աշխատանքներին։ Այս մասին ճեպազրույցում հայտարարել է Ռուսաստանի նախագահի մամուլի քարտուղար Դմիտրի Պեսկովը։

«Նրանք որպես այդպիսին չկան, – ասել է Կրեմլի ներկայացուցիչը՝ պատասխանելով Հայաստանի հետ անվտանգության ոլորտում հարաբերությունների վիճակի վերաբերյալ հարցին։

«Դուք գիտեք, որ Երևանն այժմ դե ֆակտո չի մասնակցում ՀԱՊԿ-ի աշխատանքներին։ Դուք լսել եք Երևանի պաշտոնական հայտարարությունը՝ ՀԱՊԿ-ին մասնակցության նպատակահարմարության վերաբերյալ դիրքորոշման մասին», – պարզաբանել է Պեսկովը։

«Իսկապես, կանոնադրական փաստաթղթերով նախատեսված են որոշակի քայլեր, իսկ հետագա զարգացումներն արդեն կախված կլինեն նրանից, թե ինչպիսի քննարկումներ տեղի կունենան կազմակերպության շրջանակում», – հավելել է նա։

Հիշեցնենք, որ ավելի վաղ  Ռուսաստանի  ԱԳ  փոխնախարար Ալեքսանդր Պանկինը հայտարարել էր, որ ՀԱՊԿ Հավաքական անվտանգության խորհուրդը հաջորդ շաբաթ կարող է որոշում կայացնել՝ Հայաստանին կազմակերպությունում ձայնի իրավունքից զրկելու վերաբերյալ։

Իսկ ՀԱՊԿ նախկին գլխավոր քարտուղար Նիկոլայ Բորդյուժան կոչ էր արել հեռացնել Հայաստանին կազմակերպության կազմից։

ՀՀ վարչապետ Փաշինյանմ էլ հայտարարել էր, որ Հայաստանը ՀԱՊԿ վերադառնալու ոչ մի պլան չունի․ «Ես կարող եմ վստահ ասել, որ մենք ՀԱՊԿ-ում մեր աշխատանքները չենք ակտիվացնելու։․․․ Ես շատ գոհ կլինեմ, եթե կազմակերպությունը որոշի Հայաստանին հեռացնել ՀԱՊԿ-ից»։

Թարգմանությունը՝ Էմմա Չոբանյանի