23.06.2026 | 00:27
Ամենամեծ էկրանով ստադիոնը, չսպասված երկրպագուներ. ԱԱ-2026-ի Բելգիա-Իրան խաղը` Factor TV-ի աչքերով
Լոնդոնը կարող է հրաժարվել Brexit-ից. Եվրոպական դատարանը հրապարակել է որոշումը
Քաղաքականություն
10.12.2018 | 15:28
Մեծ Բրիտանիան իրավունք ունի միակողմանի կարգով հրաժարվել Եվրամիությունից դուրս գալուց: Նման որոշում է հրապարակել Եվրոպական դատարանը (ԵՄ բարձրագույն դատական մարմինը), գրում է rg.ru-ն:
«Միացյալ Թագավորությունը կարող է ազատորեն հետ կանչել Եվրամիության կազմից դուրս գալու մտադրության մասին իր ծանուցումը»,- ասված է դատարանի որոշման մեջ: Այդ դեպքում, ըստ փաստաթղթի, Մեծ Բրիտանիան ԵՄ-ում կմնա՝ առանց կարգավիճակի որևէ փոփոխության:
Փաստաթղթում նաև նշվում է, որ Լոնդոնն այս իրավունքից կարող է օգտվել ցանկացած պահի՝ մինչև Եվրոպական խորհրդի ծանուցման պահից երկամյա ժամկետի լրանալը (այսինքն՝ 2019թ. մարտի 29-ը) կամ մինչև ԵՄ-ի և Մեծ Բրիտանիայի միջև կնքված համաձայնագրի ուժի մեջ մտնելը (2019թ. մարտի 30-ը):
Եվրամիության և Մեծ Բրիտանիայի միջև համաձայնագրի նախագիծը հավանության է արժանացել նոյեմբերի 25-ին ԵՄ անդամ պետությունների արտահերթ գագաթնաժողովի ժամանակ, բայց այն պետք է քվեարկության դրվի նաև բրիտանական խորհրդարանում:
Բրիտանական լրատվամիջոցների փոխանցմամբ՝ վարչապետ Թերեզա Մեյը խորհրդարանում մեծամասնություն չունի առանց Հյուսիսային Իռլանդիայի Դեմոկրատական յունիոնիստական կուսակցության, իսկ վերջինը պատրաստվում է դեմ քվեարկել գործարքին՝ ներկա պայմաններով: Բացի այդ, իր սեփական՝ Պահպանողական կուսակցությունում ևս Մեյը չի կարող հույս դնել խմբակցության շուրջ հարյուր անդամի վրա, քանի որ ընդդիմությունը դեմ է ԵՄ-ի հետ գործարքին:
Հիշեցնենք, որ Եվրամիությանն անդամակցությունից հրաժարվելու մասին որոշումը Մեծ Բրիտանիան կայացրեց 2016 թվականի հունիսի 23-ի հանրաքվեի արդյունքում: Որոշումը ստացավ քվեարկությանը մասնակցած քաղաքացիների կեսից ավելիի աջակցությունը:
