01.10.2026 | 15:10
Փաշինյանը՝ ԵԽԽՎ զեկույցում արձանագրված խնդիրների մասին // ՀՀ-ն գազի թանկացման ազդակ չի ստացել․ ԼՈՒՐԵՐ
Ազդակ չունենք. Փաշինյանը` գազի գնի թանկացման մասին․ ՏԵՍԱՆՅՈՒԹ
Տնտեսություն
01.10.2026 | 13:03
Վարչապետ Նիկոլ Փաշինյանը ճեպազրույցի ժամանակ անդրադառնալով բնական գազի սակագնի հնարավոր փոփոխությանն ու սպառողների վրա դրա ազդեցությանը, հայտարարեց, որ այս պահին գազի գնի թանկացման վերաբերյալ որևէ ազդակ չկա։
Լրագրողի հարցին, թե ինչ է պատրաստվում ձեռնարկել Կառավարությունը սպառողների վրա հնարավոր ազդեցությունը մեղմելու համար, և ինչ այլընտրանքներ կան ռուսական գազին, վարչապետը պատասխանեց, որ հարցի քննարկումն այս պահին պատեհ չի համարում։
«Դուք գիտեք, էլի ասել եմ, մենք այս պահի դրությամբ որևէ նման ազդակ չունենք, հետևաբար այդ հարցի քննարկումը պատեհ չեմ համարում… Երբ որ ազդակ կլինի, երբ որ իրավիճակ կլինի, մենք դրա մասին կմտածենք»,- ասաց նա։
Վարչապետն ընդգծեց, որ Կառավարությունը մտածում է հնարավոր իրավիճակների կառավարման մասին, քանի որ 2018 թվականից ի վեր ամեն տարի առնչվում է այդ հարցադրումներին։
«Այսինքն՝ մենք տարբեր սցենարներ ենք բնականաբար քննարկում՝ ոչ միայն դրա հետ կապված, ամեն ինչի հետ կապված։ Դա Կառավարության դերն է, որպեսզի կարողանա հաշվարկել, ծանր ու թեթև անել, բայց այս պահին մենք այդպիսի ազդակ չունենք»,-նշեց նա։
Մանրամասները՝ տեսանյութում։
Եվգենյա Համբարձումյան
