25.09.2026 | 16:53
«Եդինայա Ռոսիա»-ն նոր Պետդումայում ստացել է 450 մանդատից 349-ը․ պատերազմի 46 մասնակիցներ կլինեն խորհրդարանում
Հայաստանն ու ԱՄՆ-ը քննարկել են կարեւորագույն հանքանյութերի ոլորտում համագործակցության խորացումը
Տնտեսություն
25.09.2026 | 15:35
ԲԸՏՄ ղեկավար Հովհաննես Մարտիրոսյանն ընդունել է ԱՄՆ Պետդեպարտամենտի պատվիրակությանը։ Քննարկվել են կարեւորագույն հանքանյութերի արդյունահանման, վերամշակման ու մատակարարման ոլորտներում համագործակցության ընդլայնումը, այդ թվում՝ երկրաբանական քարտեզագրումը, նոր տեխնոլոգիաների կիրառումն ու ավելացված արժեք ստեղծող արտադրության զարգացումը։
«ՀՀ բնապահպանության և ընդերքի տեսչական մարմնի ղեկավար Հովհաննես Մարտիրոսյանն ընդունել է Ամերիկայի Միացյալ Նահանգների Պետդեպարտամենտի Տնտեսական, էներգետիկ և գործարար հարցերի բյուրոյի Էներգետիկ մատակարարման շղթաների գրասենյակի տնօրեն Պոլ Հյուպերի գլխավորած պատվիրակությանը։
Հանդիպման առանցքում 2026 թվականին Հայաստանի Հանրապետության և Ամերիկայի Միացյալ Նահանգների միջև կնքված՝ կարևորագույն հանքանյութերի և հազվագյուտ հանածոների արդյունահանման, մշակման և մատակարարման ապահովման շրջանակային հուշագրի հիման վրա համագործակցության խորացմանն ու ընդլայնմանն առնչվող հարցերն էին։
Քննարկումների ընթացքում կողմերն անդրադարձել են երկրաբանական տվյալների և մասնագիտական փորձի փոխանակմանը, ժամանակակից տեխնոլոգիաների կիրառմամբ երկրաբանական քարտեզագրմանը, տեխնիկական կարողությունների զարգացմանը, ինչպես նաև Հայաստանի հանքային ռեսուրսների ուսումնասիրման, արդյունահանման, տարանջատման և վերամշակման, հանքարդյունաբերական տարածքների վերականգնման ծրագրերի ուղղություններով համագործակցության հնարավորություններին։ Առանձնահատուկ ուշադրություն է դարձվել ավելացված արժեք ստեղծող մշակման կարողությունների զարգացմանը։
Կողմերն անդրադարձել են նաև ոլորտային համագործակցության ինստիտուցիոնալ հիմքերի ամրապնդմանը, համապատասխան պետական կառույցների միջև գործնական փոխգործակցության ընդլայնմանը, ինչպես նաև միջազգային լավագույն փորձի փոխանակմանն ու մասնագիտական կարողությունների զարգացմանը։
Հանդիպման ավարտին կողմերը կարևորել են տարածաշրջանային և միջազգային մատակարարման շղթաների դիմակայունության բարձրացումը և կարևորագույն հանքանյութերի հասանելիության ապահովումը՝ վերահաստատելով ոլորտում երկխոսությունն ու գործնական համագործակցությունը շարունակելու պատրաստակամությունը»,- ասված է ԲԸՏՄ-ի տարածած հաղորդագրությունում։
