Մամիկոն Ասլանյանի նկատմամբ կիրառված բացակայելու արգելքը վերացվեց

ԱԺ «Ուժեղ Հայաստան» խմբակցության պատգամավոր, Վանաձոր համայնքի նախկին ղեկավար Մամիկոն Ասլանյանի նկատմամբ կիրառված բացակայելու արգելք խափանման միջոցը վերացվեց։ Հակակոռուպցիոն դատարանի դատավոր Սարգիս Պետրոսյանը որոշում կայացրեց բավարարել պաշտպանական կողմի միջնորդությունը և մեղմացնել Ասլանյանի խափանման միջոցը, թողնելով միայն կիրառված 3 մլն գրավը։

Հիշեցնենք՝ ամիսներ առաջ Հակակոռուպցիոն կոմիտեն հաղորդագրություն տարածեց, նշելով՝ Վանաձոր համայնքի ղեկավարի պաշտոնը զբաղեցրած անձը պաշտոնեական դիրքն օգտագործել է ծառայության շահերին հակառակ և կատարել պաշտոնեական կեղծիք։

«Պարզվել է, որ 2021թ. հիշյալ պաշտոնյան նպատակադրվել է Վանաձոր համայնքին անհատույց սեփականության իրավունքով փոխանցված 3,12 հա մակերեսով հողամասից առանձնացնել դրա մի մասը և օրենսդրությամբ սահմանված կարգի խախտմամբ այն օտարել Վանաձոր քաղաքի բնակչին: Հանցավոր մտադրությունն իրագործելու նպատակով հիշյալ պաշտոնատար անձը փոխել է նշված անշարժ գույքից առանձնացված տարբեր մակերեսներով հողամասների գործառնական նշանակությունը և դրանց տրամադրել հասցեներ՝ այդ կերպ նշված հողամասերն առանց մրցույթի կառուցապատման իրավունքով տրամադրելու համար ստեղծելով արհեստական հիմքեր:

Այնուհետև, պաշտոնական փաստաթղթերում կեղծ տեղեկություններ ներառելու եղանակով, նույն պաշտոնյան Վանաձոր քաղաքի Տիգրան Մեծ պողոտայում գտնվող հողամասերն առանց ավագանու որոշման, ուղղակի վաճառքի եղանակով օտարել է Վանաձոր քաղաքի բնակչին, որի հետևանքով համայնքը զրկվել է համայնքային սեփականություն հանդիսացող՝ 24.890.000 դրամ շուկայական արժեքով գույքը տնօրինելու հնարավորությունից»,- նշվում էր հաղորդագրության մեջ։

Հիշեցնենք՝ հունվարի վերջին մեկ այլ գործով Մամիկոն Ասլանյանը դատապարտվել էր 4 տարի 4 ամիս ժամկետով ազատազրկման։ Հակակոռուպցիոն դատարանը՝ դատավոր Սարգիս Դադոյանի նախագահությամբ, հաշվակցելով կալանքի տակ անցկացրած ժամկետը՝ Ասլանյանի նկատմամբ վերջնական պատժաչափ էր նշանակել 1 տարի 9 ամիս ժամկետով ազատազրկումը, տուգանք` 500 հազար դրամի չափով: Նախկին քաղաքապետը նաև 3 տարով զրկվել էր պաշտոն զբաղեցնելու իրավունքից։

Նա մեղադրվում էր պաշտոնեական լիազորությունները չարաշահելու, պաշտոնեական լիազորություններն անցնելու, պաշտոնեական կեղծիքի հատկանիշներով։

Ռոզա Վարդանյան