Նիկոլ Փաշինյանի մի քանի արձան կա, էժան նյութից են պատրաստված, չարժի՞ ոսկե արձան դնել․ Ղազարյանը՝ Մխիթարյանին

Ազգային ժողովում Տարածքային կառավարման և շրջակա միջավայրի պահպանության հարցերի մշտական հանձնաժողովի նախագահի ընտրության ժամանակ «Ուժեղ Հայաստան» խմբակցության պատգամավոր Էդգար Ղազարյանը դիմեց հանձնաժողովի նախագահի թեկնածու, իր թիմակից Ռուբեն Մխիթարյանին։

Անդրադառնալով Նիկոլ Փաշինյանի արձաններին («Իմ քայլը», «Քայլող Նիկոլը»- խմբ․)՝ Ղազարյանը կարծիք հայտնեց, որ դրանք պատրաստված են էժանագին նյութերից, գեղարվեստական արժեք չունեն և պարբերաբար վանդալիզմի են ենթարկվում։

«Չարժի՞ արդյոք, որ Նիկոլ Փաշինյանի ոսկեձույլ արձանները սուբվենցիոն ծրագրերի շրջանակներում տեղադրվեն Հայաստանի տարբեր քաղաքներում»,- հարցրեց պատգամավորը։

Ռուբեն Մխիթարյանն արձագանքեց, որ մարդկանց կենդանության օրոք արձան չեն կանգնեցնում, և նման նախաձեռնությունն անընդունելի ու ոչ նպատակահարմար։

Ղազարյանը, սակայն, շարունակեց՝ զուգահեռներ անցկացնելով Շառլ Ազնավուրի կենդանության օրոք Գյումրիում տեղադրված արձանի հետ։

«Ազնավուրի արձանը դրվել է որպես ազգային հերոսի և մեծ բարերարի։ Բա Փաշինյանն էլ այնքա՜ն «մեծ գործեր» է արել. «նոր պատերազմ՝ նոր տարածքներ» էր ասում, տեսե՛ք՝ Բաքվում ինչ «Ռազմավարի պուրակ» է բացվել, Արցախում ինչքան օդանավակայաններ են կառուցվել։ Բա չարժի՞ այդպիսի մարդու արձանը ոսկուց ձուլել ու բոլոր քաղաքներում դնել»,- ասաց Ղազարյանը։

«Միանշանակ չարժի։ Ասեմ ավելին՝ ճիշտ չէ նաև Շառլ Ազնավուրին ու Նիկոլ Փաշինյանին համեմատելը։ Պատասխանս միանշանակ է՝ ո՛չ»,- պատասխանեց պատգամավորը։

Մանրամասները՝ տեսանյութում։

Անի Թամրազյան