Գրոնոն Երևանում քննարկել է Հայաստանի և Ադրբեջանի միջև խաղաղության ինստիտուցիոնալացումը

Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցիչ Մագդալենա Գրոնոն Երևանում հանդիպել է ՀՀ ԱԳՄԱ նախարարի տեղակալ Վահան Կոստանյանի հետ։ Կողմերը քննարկել են Հայաստան–ԵՄ հարաբերությունները, ինչպես նաև Հայաստանի և Ադրբեջանի միջև խաղաղության ինստիտուցիոնալացման համատեքստում ԵՄ հատուկ ներկայացուցչի վերջին գործունեությունն ու դրա արդյունավետությունը։ Մինչ այդ Գրոնոն այցելել էր Ադրբեջան։

«Սեպտեմբերի 14-ին ՀՀ արտաքին գործերի և միջազգային առևտրի նախարարի տեղակալ Վահան Կոստանյանի ուղեկցությամբ Հարավային Կովկասի և Վրաստանի ճգնաժամի հարցերով Եվրոպական միության հատուկ ներկայացուցիչ Մագդալենա Գրոնոն այցելել է «Մատենադարան» Մաշտոցի անվան հին ձեռագրերի գիտահետազոտական ինստիտուտ:

«Մատենադարանում» հյուրը ծանոթացել է հայկական ձեռագրերի հարուստ հավաքածուին և դրանց պատմությանը, ինչպես նաև հին ձեռագրերի պահպանման, մշակման և թանգարանային ցուցադրության նպատակով կրկնօրինակների պատրաստման ավանդույթներին: Ընդգծվել է հայկական և համաշխարհային մշակութային ժառանգության, այդ թվում՝ հին ձեռագրերի պահպանման հարցում Հայաստանի կողմից ցուցաբերվող օրինակելի և միջազգայնորեն ճանաչված ներդրումը:

Հաջորդիվ «Մատենադարանում» ՀՀ ԱԳՄԱ նախարարի տեղակալ Վահան Կոստանյանը զրույց է ունեցել Մագդալենա Գրոնոյի հետ, որի ընթացքում քննարկվել են Հայաստան-ԵՄ հարաբերությունները, անդրադարձ է կատարվել վերջին շրջանում Հարավային Կովկասի և Վրաստանի ճգնաժամի հարցերով ԵՄ հատուկ ներկայացուցչի մանդատի շրջանակներում կատարված գործողություններին և դրանց արդյունավետությանը՝ Հայաստանի և Ադրբեջանի միջև հաստատված խաղաղության ինստիտուցիոնալացման համատեքստում»,- ասված է ՀՀ ԱԳՆ-ի տարածած հաղորագրությունում։

Հիշեցնենք, որ Բաքվում և Արցախի տարածքներ կատարած այցից հետո Գրոնոն X-ում գրել էր, որ մշակութային և կրոնական ժառանգության որոշ վայրերի ծագման վերաբերյալ շարունակում են պահպանվել «խորը տարբերվող տեսակետներ և նարատիվներ», որոնք, ըստ նրա, պետք է քննարկվեն Հայաստանի և Ադրբեջանի միջև հաշտեցման գործընթացի շրջանակում։ Ուշագրավ է, որ այցն անցկացվել էր Ադրբեջանի իշխանությունների կազմակերպմամբ, իսկ նախագահ Ալիևի օգնական Հիքմեթ Հաջիևը նույն ընթացքում Գանձասարն ու Դադիվանքը ներկայացրել էր որպես «կովկասյան աղվանական քրիստոնեական ժառանգություն»՝ կրկնելով պաշտոնական Բաքվի թեզերը։