Արմաշի նախկին զորանոցի տարածքը հետ են վերցնում Ջրային կոմիտեից․ «Արարատ» ՋՕԸ-ն այն չի օգտագործել

Արարատի մարզի Արմաշ բնակավայրում գտնվող պետական գույքը, որը 2025 թվականին ամրացվել էր ՀՀ ՏԿԵՆ Ջրային կոմիտեին, նախատեսվում է հետ վերցնել և ամրացնել Պետական գույքի կառավարման կոմիտեին։

Խոսքը Արմաշի Երևանյան խճուղի 1/4գ (Երասխ-2) հասցեում գտնվող 0.8904 հա հողամասի մասին է։ Գույքի շուկայական արժեքին մոտարկված կադաստրային արժեքը կազմում է 4 մլն 583 հազար 779 դրամ։

Տարածքը Ջրային կոմիտեին էր ամրացվել Կառավարության 2025 թվականի հուլիսի 3-ի N 908-Ա որոշմամբ։

Դրանից առաջ «Արարատ» ջրօգտագործողների ընկերությունը դիմել էր Ջրային կոմիտեին՝ նախկին զորանոցի չօգտագործվող տարածքն իրեն տրամադրելու խնդրանքով։ Ընկերությունը նշել էր, որ չունի վարչական շենք և պահեստային տարածք։

Նախագծում նշված է, որ գույքը նախատեսված նպատակով այդպես էլ չի օգտագործվել։ «Արարատ» ՋՕԸ-ն 2025 թվականի օգոստոսին Ջրային կոմիտեին հայտնել է, որ տարածքում որևէ շինություն չկա, իսկ ընկերությունը ֆինանսական հնարավորություն չունի նոր շենք կառուցելու համար։

Դրանից հետո ՏԿԵՆ Պետական գույքի կառավարման կոմիտեն մշակել է գույքը Ջրային կոմիտեից հետ վերցնելու և իրեն ամրացնելու մասին որոշման նախագիծ։

Նախագծի համաձայն՝ որոշումն ուժի մեջ մտնելուց հետո երկամսյա ժամկետում Պետական գույքի կառավարման կոմիտեն և Ջրային կոմիտեն պետք է իրականացնեն գույքի հանձնման-ընդունման աշխատանքները։

Կառավարության հիմնավորման համաձայն՝ գույքը հետ վերցնելու և Պետական գույքի կառավարման կոմիտեին ամրացնելու նախագիծը բխում է պետական գույքի արդյունավետ կառավարման անհրաժեշտությունից և «Հայաստանի վերափոխման ռազմավարություն 2050»-ի ու Կառավարության 2021-2026 թվականների ծրագրի համապատասխան դրույթներից։

Նկարը գեներացված է ԱԲ-ով

Արփի Հակոբյան