08.11.2026 | 21:21
Առատ ձյան պատճառով Գորայք-Մեղրի ճանապարհը փակ է կցորդիչով բեռնատարների համար
Հայտնի է Կաթողիկոսի և 6 եպիսկոպոսների գործով նիստի օրը
Հասարակություն
10.09.2026 | 08:52
Գարեգին Բ ամենյան հայոց կաթողիկոսի և 6 եպիսկոպոսների գործով դատական նիստի օրը հայտնի է. կրկին Արմավիրի մարզի ընդհանուր իրավասության դատարանի դատավոր Սերժ Ռուշանյանին մակագրված քննությունը նշանակվել է սեպտեմբերի 18-ին ժամը 15:00-ին։
Հիշեցնենք՝ օգոստոսի 7-ին Գարեգին Բ-ն և 6 եպիսկոպոսները նստեցին ամբաստանյալի աթոռին ընդամենը 20 րոպե․ Արմավիրի մարզի ընդհանուր իրավասության դատարանի դատավոր Հակոբ Մանուկյանն ինքնաբացարկ հայտնեց, պատճառաբանեց՝ Արա Զոհրաբյանը, որը հոգևորականների շահերն է պաշտպանում, ժամանակին իրեն փաստաբանի արտոնագիր է տվել։ Երեք օր անց գործը մակագրվեց նույն մարզի դատավոր Սերժ Ռուշանյանին, սակայն նա էլ չսկսեց գործի քննությունը և այն ուղարկեց Երևանի ընդհանուր իրավասության դատարան, պատճառաբանելով՝ պարզ չէ ենթադրյալ հանցանքի կատարման վայրը։
Երևանի ընդհանուր իրավասության դատարանում էլ գործը մակագրվեց Վահագն Մելիքյանին, հենց այս դատավորն էլ գործն ուղարկեց Վճռաբեկ դատարան։ Չորս օր անց քրեական պալատը որոշումը հրապարակեց՝ գործը կրկին ուղարկվելով Արմավիրի մարզի ընդհանուր իրավասության դատարան, պատճառաբանելով՝ վարույթն ընդդատյա է հենց այդ դատարանին։
Հիշեցնենք՝ փետրվարի 14-ին Ավստրիայում կայանալիք Եպիսկոպոսաց ժողովից 3 օր առաջ բարձրաստիճան հոգևորականներին մեղադրանք առաջադրվեց և Հայաստանից նրանց ելքն արգելվեց։ Ըստ մեղադրանքի՝ նրանք խոչընդոտել են Մասյացոտնի թեմի առաջնորդ Գևորգ եպիսկոպոս Սարոյանի վերաբերյալ դատական ակտի կատարմանը։ Սարոյանն իրեն թեմի առաջնորդի պաշտոնից ազատելու որոշումը վիճարկել էր դատարանում՝ միաժամանակ ներկայացնելով նաև հայցի ապահովման միջոց կիրառելու միջնորդություն, որով խնդրել է մինչև վերջնական դատական ակտ կայացնելը իրեն վերականգնել թեմի առաջնորդի պաշտոնում։ Դատարանը բավարարել էր միջնորդությունը։
Հոգևորականը, սակայն, ոչ միայն չէր վերականգնվել պաշտոնում, այլև կարգալույծ էր հռչակվել, իսկ Գարեգին Բ-ի որոշմամբ թեմի առաջնորդ էր նշանակվել մեկ այլ հոգևորական։ Ամբողջ մեղադրանքը կառուցված է հենց այս միջադեպի շուրջ:
Փաստացի, Գարեգին Բ-ի հրաժարականի վերաբերյալ Նիկոլ Փաշինյանի պահանջից մոտ 10 ամիս անց կաթողիկոսը հայտնվեց մեղադրյալի աթոռին:
Ռոզա Վարդանյան
