Նորվեգիայի վարչապետը հայտարարել է, որ Մոլդովայում ԱԹՍ-ն «գրեթե հարվածել է» Զելենսկիի ինքնաթիռին

Ուկրաինայի նախագահ Վլադիմիր Զելենսկիի ինքնաթիռը, որով նա մեկնել է Օլսո՝ Նորվեգիայի թագավորի հուղարկավորությանը մասնակցելու համար, գրեթե բախվել է անօդաչու թռչող սարքի Մոլդովայից թռիչքի ժամանակ։ Այս մասին NRK հանրային հեռարձակողին ասել է Նորվեգիայի վարչապետ Յոնաս Գահր Ստյորեն, գրում է Reuters-ը։

«Նրա ինքնաթիռը գրեթե հարվածի է ենթարկվել անօդաչու թռչող սարքի կողմից Մոլդովայից թռիչքի պատրաստվելիս։ Սա այն իրականությունն է, որի հետ նա բախվում է»,- ասել է Ստյորեն՝ առանց մանրամասնելու, թե որտեղից է ստացել այս տեղեկությունը կամ որքան մոտ է գտնվել անօդաչուն ինքնաթիռին։

Մոլդովայի պաշտոնյաները որևէ մեկնաբանություն չեն արել այս հայտարարության վերաբերյալ։

Երեքշաբթի Քիշնևի օդանավակայանում ժամանումներն ու մեկնումները որոշ ժամանակով կասեցվել էին՝ կապված Մոլդովայի օդային տարածք մուտք գործած երկու ռուսական անօդաչու թռչող սարքերի հետ։ Flightradar24-ի տվյալների համաձայն՝ երկրի մայրաքաղաք մեկնող մի քանի չվերթներ վայրէջք են կատարել Մոլդովայից դուրս գտնվող օդանավակայաններում կամ ստիպված են եղել կանգառներ կատարել։ Մեկ անօդաչու թռչող սարք ընկել է դաշտում՝ հրդեհ առաջացնելով, իսկ երկրորդը շարունակել է թռիչքը և մտել Ռումինիայի օդային տարածք։

Մոլդովայի նախագահ Մայա Սանդուն դատապարտել է անօդաչուների ներխուժումները՝ դրանք որակելով որպես «լուրջ սպառնալիք մարդկանց կյանքին»։ Նա նաև դատապարտել է Ուկրաինայի հետ սահմանային անցակետի վրա հարձակումը, որի հետևանքով 2 մարդ է զոհվել։

Զելենսկին չորեքշաբթի, այլ պետությունների ղեկավարների հետ, մասնակցել է Նորվեգիայի թագավոր Հարալդ V-ի հուղարկավորությանը։ Նա Նորվեգիայից հեռացել է հուղարկավորության ավարտից անմիջապես հետո։ Ստյորեն երեքշաբթի  հայտարարել էր, որ այդ երեկո հանդիպելու է Ուկրաինայի առաջնորդի հետ, իսկ քննարկումների հիմնական թեման լինելու է Ուկրաինայի հակաօդային պաշտպանությունը։ Զելենսկին էլ հայտնել էր, որ Նորվեգիա կատարած այցի ընթացքում նախատեսվում են քննարկումներ Freyja նախաձեռնությանը մասնակցող ընկերությունների հետ։ Նախաձեռնության նպատակն է՝ ստեղծել եվրոպական հակաբալիստիկ պաշտպանության համակարգ։