05.11.2026 | 23:32
Հայաստան-Լիտվա համագործակցություն․ Վահան Կոստանյանը աշխատանքային այցով մեկնել է Վիլնյուս
Բաքվի դատարանը ադրբեջանցի հայտնի իրավապաշտպանին դատապարտել է 13 տարվա ազատազրկման
Քաղաքականություն
08.09.2026 | 21:05
Բաքվի ծանր հանցագործությունների դատարանը նախօրեին դատավճիռ է կայացրել Ընտրությունների մոնիթորինգի և ժողովրդավարության ուսումնասիրությունների կենտրոնի բանտարկված նախագահ, հայտնի իրավապաշտպան Անար Մամեդլիի և հասարակական ակտիվիստ Անար Աբդուլլայի գործով։ Դատական նիստը նախագահել է դատավոր Այգյուն Գուրբանովան, հայտնում են ադրբեջանական լրատվամիջոցները։
Դատավճռի համաձայն՝ Անար Մամեդլին դատապարտվել է 13 տարվա ազատազրկման, իսկ Անար Աբդուլլան՝ 12 տարվա։ Նախորդ դատական նիստում պետական մեղադրողը Մամեդլիի համար պահանջել էր 14, իսկ Աբդուլլայի համար՝ 13 տարվա ազատազրկում։
Անար Մամեդլին ձերբակալվել է 2024 թվականի ապրիլի 29-ին։ Նրան մեղադրանք է առաջադրվել մի խումբ անձանց կողմից նախնական դավադրությամբ կատարված մաքսանենգության համար։ Մամեդլին չի ընդունում իր մեղքը։ Միջազգային իրավապաշտպան կազմակերպությունները նրան համարում են քաղբանտարկյալ։
Անար Աբդուլլային մեղադրանք է առաջադրվել 2024 թվականի ապրիլի 8-ին՝ Մամեդլիի դեմ հարուցված քրեական գործի շրջանակում։
Նրան մեղադրանքներ են առաջադրվել Ադրբեջանի քրեական օրենսգրքի մի շարք հոդվածներով, այդ թվում՝ անօրինական ձեռնարկատիրության, կեղծ ձեռնարկատիրության, մաքսանենգության, հարկերից խուսափելու, գործազրկության ապահովագրության, պարտադիր առողջապահական ապահովագրության և պարտադիր պետական սոցիալական ապահովագրության վճարներից խուսափելու համար։
Աբդուլլային նաև մեղադրում են մի խումբ անձանց կողմից նախնական դավադրությամբ կատարված մաքսանենգության, ինչպես նաև պաշտոնական փաստաթղթերի, պետական պարգևների, կնիքների, դրոշմանիշների և ձևաթղթերի կեղծման մեջ։
Նրանք հերքում են առաջադրված մեղադրանքները՝ պնդելով, որ քրեական հետապնդումը կապված է իրենց գործունեության հետ և ունի քաղաքական դրդապատճառներ։
Տեղացի իրավապաշտպանների տվյալներով՝ Ադրբեջանում ներկայումս կա 328 մարդ, որոնց նրանք համարում են քաղբանտարկյալներ։
Թարգմանությունը՝ Էմմա Չոբանյանի
