Արդեն վախեցնում է ինձ․ եթե պիտի խզբզեն, մենք էլ ունենք խզբզողներ․ Ավինյանը բարկացավ․ ՏԵՍԱՆՅՈւԹ

Դալմայի այգիների հետ կապված մրցութային գործընթացը դեռևս ամփոփման փուլում է։ Երևանի քաղաքապետարանի գործակարգավարական նիստում քաղաքապետ Տիգրան Ավինյանը հետաքրքրվեց, թե ինչու է գործընթացը ձգձգվում, և արդյոք հնարավոր կլինի այն ներկայացնել COP17-ի շրջանակում։

«Երևանի կառուցապատման ներդրումային ծրագրերի իրականացման գրասենյակ» համայնքային ոչ առևտրային կազմակերպության տնօրենի ժամանակավոր պաշտոնակատար Անետա Բաբայանը հայտնեց, որ Ասիական զարգացման բանկի միջոցով անցկացվող մրցույթի գնահատման փաթեթները ներկայացվել են, սակայն շուրջ երկու ամիս բանկի կողմից ուսումնասիրվել են մասնակից ընկերություններին վերաբերող հարցեր։

Նրա խոսքով՝ միջազգային կառույցից օրերս ստացել են դիտարկումներ, որոնք այժմ ամփոփվում են։ Վերջնական փաթեթը նախատեսվում է ներկայացնել այս շաբաթ, իսկ հաղթող ընկերությունը, ըստ պաշտոնյայի, կարող է ընտրվել սեպտեմբերին։

COP17-ի ընթացքում Դալմայի այգիների հետ կապված որոշ լուծումներ ներկայացնելու համար նախատեսվում է նաև նախապատրաստական աշխատանքներ իրականացնել։
Սակայն քաղաքապետ Տիգրան Ավինյանը կասկած հայտնեց, որ նախատեսված ժամկետում հնարավոր կլինի ունենալ բավարար արդյունք։

«Ես այս տեմպով տեսնում եմ, որ չենք ունենա»,- ասաց քաղաքապետը՝ հիշեցնելով, որ COP17-ը նախատեսված է հոկտեմբերի 19-30-ը, իսկ մրցութային գործընթացը դեռևս ավարտված չէ։

Քաղաքապետը նաև հարցրեց, թե ինչու իրեն չեն տեղեկացրել գործընթացի ձգձգման մասին։ Անետա Բաբայանը պատասխանեց, որ Ասիական զարգացման բանկի գործընկերները հավաստիացրել են՝ COP17-ի շրջանակում որևէ բան ցուցադրելու հնարավորություն քաղաքապետարանը կունենա։

Ավինյանին, սակայն, այդ ձևակերպումը չբավարարեց․ «Այդ «որևէ բան»-ը արդեն վախեցնում է ինձ, որովհետև եթե պետք է այնքան որ խզբզի ինչ-որ մեկը ինչ-որ մի բան մինչև COP17-ը, ավելի լավ է` չխզբզեն։ Խզբզողներից մենք էլ ունենք, կարող ենք իրենց խնդրենք, իրենք խզբզեն, դրա համար պետք չէ մեծ գումարներ վճարել»։

Քաղաքապետը հանձնարարեց մանրամասն ներկայացնել մրցութային գործընթացի ձգձգման պատճառները և մինչ այս պահը կատարված աշխատանքները։

Մանրամասները՝ տեսանյութում։

Արփի Հակոբյան