ԱՄՆ ցամաքային զորքերի նախարարը հրաժարական է տվել Հեգսեթի հետ կոնֆլիկտի պատճառով

ԱՄՆ ցամաքային զորքերի նախարար  Դենիել Դրիսկոլը հրաժարականի դիմում է ներկայացրել ԱՄՆ նախագահ Դոնալդ Թրամփին՝ Պենտագոնի ղեկավար Փիթ Հեգսեթի հետ ԱՄՆ զինված ուժերի զարգացման քաղաքականության և մի շարք սպաների պաշտոնանկությունների շուրջ մի քանի ամիս տևած տարաձայնություններից հետո։ Այս մասին   հայտնել է The Wall Street Journal-ը։ Ավելի ուշ տեղեկությունը տարածել են նաև Reuters և AP գործակալությունները, գրում է DW-ն։

NBC News-ը, հղում անելով իր աղբյուրներին, հայտնել է, որ Սպիտակ տունն ընդունել է Դրիսկոլի հրաժարականը։

Ակնկալվում է, որ Դրիսկոլը Պենտագոնը կլքի առաջիկա օրերին, գրում է WSJ-ը։ «Նախարար Դրիսկոլը արդյունավետորեն առաջ է մղել նախագահ Թրամփի «Make America Great Again» ծրագիրը ցամաքային զորքերի նախարարությունում՝ ցուցաբերելով ակնառու առաջնորդական որակներ պատմական ռազմական գործողությունների ընթացքում, վերականգնելով մարտունակության և զինված ուժերի հարվածային կարողությունների առաջնահերթությունը, աջակցելով Ռուսաստանի և Ուկրաինայի միջև բանակցություններին և բազմաթիվ այլ ուղղություններով»,- WSJ-ն ու AP-ն մեջբերում են Սպիտակ տան մամուլի քարտուղարի առաջին տեղակալ Աննա Քելիի հայտարարությունը։

Օգոստոսի 21-ին WSJ-ն հաղորդել էր, որ նախարարը պլանավորում է հրաժարական տալ տարեվերջին՝ պաշտպանության նախարարի հետ կոնֆլիկտի պատճառով։

Դանիել Դրիսկոլը ԱՄՆ փոխնախագահ Ջեյ Դի Վենսի ընկերն ու համակուրսեցին է։ 2025 թվականի նոյեմբերին նա նշանակվել էր  ԱՄՆ նախագահ Դոնալդ Թրամփի՝ Ուկրաինայի հարցերով հատուկ դեսպան՝ փոխարինելով Քիթ Քելլոգին։

Դրիսկոլը ԱՄՆ ցամաքային զորքերի նախարարի պաշտոնը զբաղեցրել է 2025 թվականի փետրվարից։

Թարգմանությունը՝ Էմմա Չոբանյանի