21.10.2026 | 11:04
ԱԺ տնտեսական հարցերի հանձնաժողովի նիստը՝ ՈՒՂԻՂ
14 անձ է ձերբակալվել Ստեփանավանում․ խուզարկություններ են իրականացվում
Հասարակություն
21.10.2026 | 10:15
Վաղ առավոտից Ստեփանավանում խուզարկություններ և վարութային այլ գործողություններ են իրականացվում։ Տեղեկությունը Factor.am-ի հետ զրույցում հաստատել են ՀՀ հակակոռուպցիոն կոմիտեից։
«Խուզարկություններն ու վարութային այլ գործողություններն իրականացվում են ՀՀ հակակոռուպցիոն կոմիտեում իրականացվող քրեական վարույթի շրջանակում: Ձերբակալվել է 14 անձ»,- հայտնեցին ՀԿԿ-ից:
Հակակոռուպցիոն կոմիտեից նշեցին, որ անհրաժեշտության դեպքում լրացուցիչ տեղեկություն կտրամադրեն։
Հիշեցնենք, որ Ստեփանավան համայնքում ավագանու համամասնական ընտրությունները կանցկացվեն 2026 թվականի հոկտեմբերի 25-ին։ Ընտրություններին մասնակցում է չորս քաղաքական ուժ՝ «Քաղաքացիական պայմանագիր», «Ուժեղ Հայաստան», «Հանրապետություն» և «Գործարար» կուսակցությունները։
Քարոզարշավի ընթացքում «Ուժեղ Հայաստան» կուսակցության ներկայացուցիչները պարբերաբար հայտարարել են իրենց թիմակիցների նկատմամբ քաղաքական հետապնդումների և վարչական ռեսուրսի օգտագործման դեպքերի մասին։
Հավելենք, որ հոկտեմբերի 20-ին Փաշինյանն անդրադարձել էր Ստեփանավանում սպասվող ՏԻՄ ընտրություններին ընդառաջ ընդդիմադիրների նկատմամբ ճնշումների մասին ահազանգերին։ Նա քաղաքացիներին ու թեկնածուներին կոչ էր արել ապօրինի ճնշումների դեպքում անմիջապես դիմել իրեն։
Նույն օրը Փաշինյանը հրապարակել էր Ստեփանավանի բժշկական կենտրոնի տնօրենի բացատրությունը։ Փաստաթղթում նշվում էր, որ աշխատակիցներից մեկը ստորագրել է մյուսի փոխարեն։ Վարչապետը հրապարակումը վերնագրել էր «Ընդդիմության ահազանգած «քաղաքական հետապնդումների» մասին»։
Միաժամանակ Հակակոռուպցիոն կոմիտեից չեն հստակեցնում, թե որ քրեական վարույթի շրջանակում են իրականացվում խուզարկություններն ու ձերբակալությունները։
Անի Թամրազյան
