Քաղաքականություն
25.08.2026 | 22:19
Թուրքիայի նախագահ Ռեջեփ Թայիփ Էրդողանը հայտարարել է, որ ահաբեկչությունից շահույթ ստացողները և տարածաշրջանն անկայունության մեջ ներքաշել ձգտողները դատապարտված են ձախողման՝ հայտարարելով, որ «արյան վաճառականները» և «ցեղասպանները», ի վերջո, տանուլ են տալու։
Բիթլիս նահանգում Մանազկերտի ճակատամարտի 955-րդ տարեդարձին նվիրված միջոցառման ժամանակ ունեցած ելույթում Էրդողանը նշել է, որ 1071 թվականի պատմական հաղթանակը Անատոլիան բացել է թուրքական ինքնիշխանության համար։ Սա Էրդողանի առաջին հրապարակային ելույթն է Իսրայելի կողմից օգոստոսի 18-ին Սիրիայի Իդլիբ նահանգում գտնվող Աբու ալ-Դուհուր ավիաբազայի վրա հարվածներից հետո։ Ելույթի ընթացքում Թուրքիայի նախագահն Իսրայելին ուղղակիորեն չի հիշատակել։
«Արյան վաճառականները պարտվելու են, ահաբեկչությունից շահույթ ստացող պատեհապաշտները պարտվելու են։ Ցեղասպանները, որոնք ձգտում են մեր տարածաշրջանը ներքաշել անկայունության մեջ, պարտվելու են»,- հայտարարել է նա։
Էրդողանը շեշտել է, որ «մեծ և ուժեղ Թուրքիայի» վերելքն այժմ անխուսափելի է՝ նշելով, որ «Ահաբեկչությունից զերծ Թուրքիայի» նախաձեռնությունը մնում է կառավարության օրակարգի կենտրոնում։
«Թող ոչ ոք կասկած չունենա։ Մեծ և ուժեղ Թուրքիայի արշալույսը բացվել է։ «Թուրքիայի դարի» կառուցումը սկսվել է», – ասել է Էրդողանը՝ ներկայիս դարաշրջանը ներկայացնելով որպես անցյալի սահմանափակումներից վերջնական խզում։
Թարգմանությունը՝ Էմմա Չոբանյանի
