Քաղաքականություն
25.08.2026 | 16:00Եվրամիությունն արձագանքել է ՀՀ վարչապետ Նիկոլ Փաշինյանի հայտարարությանը, թե Հայաստանը մտադիր է մոտ ժամանակներս սկսել ԵՄ անդամակցության հայտ ներկայացնելու գործընթաց։
«Մենք մեծ հետաքրքրությամբ ենք հետևում այս գործընթացին»,- այսօր ճեպազրույցում հայտարարեց Եվրոպական հանձնաժողովի գլխավոր խոսնակ Պաուլա Պինյոն։ Ըստ նրա՝ Եվրոպական հանձնաժողովի նախագահ Ուրսուլա ֆոն դեր Լայենը վճռականորեն աջակցում է Հայաստանի քաղաքացիների եվրոպական ձգտումներին։
«Սա ևս մեկ անգամ փաստում է այն գրավչության մասին, որն ունի Եվրոպական միությունը քաղաքացիների համար: Հայտնի է նաև, թե որքան մեծ աջակցություն է ցուցաբերում նախագահ ֆոն դեր Լայենը Հայաստանի քաղաքացիների կողմից ԵՄ-ի ուղղությամբ արտահայտված հստակ դիրքորոշմանը»,- ասաց Պաուլա Պինյոն։
Եվրահանձնաժողովի խոսնակ Մարկուս Լամերտը, անդրադառնալով Նիկոլ Փաշինյանի հայտարարությանը, նշեց․ «Հայաստանն ավելի մոտ է ԵՄ-ին, քան երբևէ: Երևանում մայիսին կայացած ԵՄ-Հայաստան առաջին գագաթնաժողովը հաջողված էր՝ ի լրումն Դիմակայունության և աճի պլանի, Եվրոպական խաղաղության հիմնադրամի (EPF) և գործընկերության առաքելությունների շրջանակում մեր գերազանց համագործակցության»։
Ըստ նրա՝ Հայաստանն արդեն արել է առաջին քայլն ԵՄ ուղղությամբ՝ ընդունելով Եվրամիության անդամակցության գործընթացի մեկնարկի մասին օրինագիծը։
«Սա կարևոր խորհրդանշական քայլ է»,-շեշտեց նա։
Միևնույն ժամանակ, ԵՄ ներկայացուցիչը հիշեցրեց, որ անդամակցության գործընթացն ունի հստակ կանոններ․
«Անշուշտ, ԵՄ-ին անդամակցումը ենթադրում է հստակ սահմանված և արժանիքների վրա հիմնված գործընթաց։ Այն պահանջում է պաշտոնական հայտ ձգտող երկրի կողմից։ Մենք արդեն իսկ աշխատում ենք Հայաստանը ԵՄ-ին ավելի մոտեցնելու ուղղությամբ, օրինակ՝ տրանսպորտային և էներգետիկ կապերի , առևտրի և բազմաթիվ այլ ոլորտների միջոցով»,- եզրափակեց նա։
Կարինե Ասատրյան
Բրյուսել
