Քաղաքականություն
24.08.2026 | 16:30Հայաստանը մտադիր է ԵՄ-ին անդամակցելու պաշտոնական դիմում ներկայացնել։ Ազգային ժողովում Կառավարության 2026-2031 թվականների ծրագիրը ներկայացնելիս այս մասին հայտարարեց վարչապետ Նիկոլ Փաշինյանը։
«Սա նույնպես ծավալուն աշխատանք պահանջող գործընթաց է, և առաջիկայում մենք, թերևս, կսկսենք այս գործընթացը, առավել ևս՝ ԵՏՄ մեր գործընկերների հորդորներին ականջալուր լինելով»,- ասաց վարչապետը։
Այս տարվա մայիսի 26-ին Աստանայում Ռուսաստանի, Բելառուսի, Ղազախստանի և Ղրղզստանի ղեկավարները համատեղ հայտարարել էին, թե Հայաստանի՝ դեպի ԵՄ անդամակցության քայլերը տնտեսական ռիսկեր են ստեղծում Եվրասիական տնտեսական միության համար և դեկտեմբերին կքննարկվեն Հայաստանի նկատմամբ ԵՏՄ պայմանագրի կիրառումը կասեցնելու հնարավոր հետևանքները։ Միաժամանակ, ԵՏՄ անդամ չորս պետությունների ղեկավարները հորդորել էին ՀՀ-ին հանրաքվե անցկացնել «ԵՄ, թե՞ ԵՏՄ» երկընտրանքի շուրջ։
Այն, որ Հայաստանն ինչ-որ փուլում ընտրություն կատարելու անհրաժեշտություն կունենա, մի քանի առիթով ասել է նաև Ռուսաստանի նախագահը։
«Միանգամայն տրամաբանական կլիներ անցկացնել հանրաքվե և հարցնել Հայաստանի քաղաքացիներին, թե ո՞րն է լինելու իրենց ընտրությունը։ Դրան համապատասխան՝ մենք էլ կանեինք համապատասխան հետևություններ և կգնայինք մեղմ, այսպես ասած, ինտելիգենտ և փոխշահավետ ապահարզանի ճանապարհով»,- ասել է Վլադիմիր Պուտինը։
Փաշինյանը շատ անգամներ է նշել, որ հանրաքվե կլինի այն ժամանակ, երբ դրա օբյեկտիվ անհրաժեշտությունը լինի։ Այդ մասին խոսել է նաև Ղրղզստանում անցկացված Եվրասիական միջկառավարական խորհրդի նիստում ունեցած ելույթում, ապա լրագրոողների հետ զրույցում ընդգծել, որ հանրաքվե կլինի այն բանից հետ, երբ ՀՀ-ն պաշտոնապես դիմի ԵՄ-ին անդամակցելու համար։
Այսօր անդրադառնալով հանրաքվեի հարցին՝ Փաշինյանը մասնավորեցրեց, թե, իր պատկերացմամբ, դա երբ կարող է տեղի ունենալ։
Ավելի վաղ վարչապետ Նիկոլ Փաշինյանը նշել էր, որ ԵՏՄ կանոնակարգերով անդամակցությունից հրաժարվելու որոշումը կարող է ընդունել միայն տվյալ պետությունը։ Թե դեկտեմբերին ի՞նչ որոշում կկայացնեն ԵՏՄ անդամ մյուս երկրները և որքանո՞վ այն կազդի Հայաստանի հետագա արտաքին քաղաքական ընտրության վրա, պարզ կդառնա առաջիկա ամիսներին։ Միևնույն ժամանակ, գործադիրի ղեկավարն այսօր հայտնեց, որ Հայաստանը մտադիր է 2029 թվականի ընթացքում հասնել ԵՄ-ի հետ վիզաների ազատականացման։
Մանրամասները՝ տեսանյութում։
Անի Թամրազյան
