20.08.2026 | 18:19
Ուելսցի մրցավարը ռեկորդակիր է դարձել 63-ամյա կարիերայի շնորհիվ․ ԼՈՒՍԱՆԿԱՐ
«Արզնի-2» ջրատարի վնասման դեպքով վարչական վարույթ է հարուցվել
20.08.2026 | 16:17
Ջրային կոմիտեում վարչական վարույթ է հարուցվել Կոտայքի մարզի Պտղնիի ձորում «Արզնի-2» ջրատարի վնասման դեպքով։ Ըստ կոմիտեի՝ տնտեսվարողը սանիտարական գոտում առանց «Վեոլիա Ջուր»-ի հետ համաձայնեցման հողային աշխատանքներ է իրականացրել, ինչի հետևանքով վնասվել են ջրատարի հենարաններն ու հիմքը, առաջացել է մեծաքանակ ջրի արտահոսք և ժամանակավորապես դադարեցվել Երևանի Կենտրոն ու Արաբկիր վարչական շրջանների ջրամատակարարումը։
«Ս.թ. օգոստոսի 3-ին Կոտայքի մարզի Պտղնիի ձորում՝ ռեստորանային համալիրի հարևանությամբ, 900 մմ տրամագծով «Արզնի-2» ջրատարի սանիտարական գոտում, առանց «Վեոլիա Ջուր» ՓԲԸ-ի հետ համաձայնեցման, տնտեսվարողի կողմից տեխնիկական միջոցների կիրառմամբ իրականացվել էին հողային աշխատանքներ՝ չպահպանելով խողովակաշարի անվտանգությունն ու պահպանությունն ապահովող պահանջները։
Տնտեսվարողի ինքնագործունեության հետևանքով վնասվել են ջրատարի հենարանների հիմքերը, քանդվել է «Արզնի-2» ջրատարի հիմքը, ինչը հանգեցրել է մեծ քանակությամբ ջրի արտահոսքի։ Վերականգնողական աշխատանքներ իրականացնելու պատճառով էական ժամանակով դադարեցվել է Երևանի Կենտրոն և Արաբկիր վարչական շրջանների ջրամատակարարումը։
Դեպքի առնչությամբ Ջրային կոմիտեում ստեղծվել է աշխատանքային խումբ, իրականացվել է ուսումնասիրություն և հարուցվել վարչական վարույթ։
Ջրային ենթակառուցվածքների, մասնավորապես՝ ջրատարների պահպանությունն ու անխափան շահագործումն ապահովելու նպատակով կոչ ենք անում տնտեսվարողներին խստագույնս պահպանել ջրատարների սանիտարական և պահպանության գոտիներում սահմանված պահանջները և ցանկացած աշխատանք իրականացնելուց առաջ այն համաձայնեցնել համապատասխան մարմինների և «Վեոլիա Ջուր» ՓԲԸ-ի հետ»,- ասված է հաղորդագրությունում։
