Արաղչին հայտարարել է, որ Իրանի պատերազմն ապացուցեց՝ արտաքին ուժերն ու բազաները չեն կարող անվտանգություն ապահովել

Իրանի պատերազմը փոխել է տարածաշրջանի անվտանգության հետ կապված մտածողությունը՝ ներկայացնելով արաբական պետություններին, որ անվտանգությունը պետք է լինի կոլեկտիվ և տարածաշրջանային, այլ ոչ թե կախված լինի անապահովության աղբյուր դարձած օտարերկրյա բազաներից։ Այս մասին հայտարարել է Իրանի ԱԳ նախարար Աբբաս Արաղչին, փոխանցում է Mehr-ը։

Նա հավելել է՝ պատերազմը ցույց է տվել, որ արտաքին ուժերն ու բազաները ոչ միայն չեն կարողացել ապահովել անվտանգությունը, այլև խաթարել են այն։

«Այն երկրները, որոնք բազաներ չունեին, մնացին անվտանգ և ավելի քիչ տուժեցին պատերազմից, քան նրանք, որոնք հյուրընկալում էին ամերիկյան բազաները, որոնք պետք է պաշտպանեին դրանք։ Այդ բազաները գործնականում պաշտպանում էին սիոնիստական ​​ռեժիմը և չէին կարող պաշտպանել իրենց»,- ասել է իրանցի պաշտոնյան։

Ըստ Արաղչիի՝ այժմ տարածաշրջանում ավելի հստակ ըմբռնում է ձևավորվել, որ Պարսից ծոցի անվտանգությունը պետք է լինի կոլեկտիվ, պետք է ներառի տնտեսական ասպեկտներ և չի կարող իրականացվել պետությունների միջև տնտեսական և անվտանգության անհավասարակշռության պայմաններում։

Արաղչին նաև նշել է, որ Իրանի հետպատերազմյան արտաքին քաղաքականությունը «լիովին տարբեր» կլինի նախապատերազմյան շրջանից։

Փետրվարի 28-ից Իրանի դեմ ԱՄՆ-Իսրայել պատերազմի մեկնարկից հետո ռազմական գործողություններն անդրադարձել են նաև Մերձավոր Արևելքի պետությունների վրա․ իրանական ուժերը պարբերաբար թիրախավորում են այդ երկրներում տեղակայված ռազմաբազաները։