Քրեական գործեր եղել են և կլինեն հետագայում․Հակոբյանը՝ ընդդիմությանը ճնշելու հարցին ի պատասխան. ՏԵՍԱՆՅՈՒԹ

Սահմանադրության փոփոխության նախագիծը նախ պետք է հրապարակվի և դրվի հանրային լայն քննարկման, որից հետո միայն կանցնի խորհրդարանական և հանրաքվեի ընթացակարգերը։ Այս մասին Factor TV-ի հետ զրույցում ասաց «Քաղաքացիական պայմանագիր» խմբակցության պատգամավոր Հասմիկ Հակոբյանը։

Նրա խոսքով՝ իշխանությունը ցանկանում է նախագծի շուրջ երկարատև և լայն քննարկում իրականացնել, որպեսզի քաղաքացիները կարողանան ծանոթանալ, առաջարկել փոփոխություններ, որից հետո նախագիծը կներկայացվի Ազգային ժողով։

Խորհրդարանը Սահմանադրության նախագիծը հանրաքվեի դնելու վերաբերյալ որոշումը պետք է ընդունի պատգամավորների ընդհանուր թվի առնվազն երկու երրորդի ձայներով։ 105 պատգամավորից բաղկացած Ազգային ժողովում դա նշանակում է առնվազն 70 ձայն։ ՔՊ-ն ունի 64 պատգամավոր, այսինքն ևս 6 պատգամավորի կողմ ձայն է անհրաժեշտ:

Անդրադառնալով ընդդիմության հայտարարությանը, թե իրենք չեն աջակցելու սահմանադրական փոփոխություններին՝ Հասմիկ Հակոբյանն ասաց, որ իշխանությունը կփորձի համոզել ընդդիմությանը։

«Տեսեք՝ դեռ իրենք էլ չգիտեն, թե ինչ է առաջարկվում: Կարող է իրենք կարդան ու տեսնեն, որ մի հրաշալի Սահմանադրության նախագիծ է, և մի բան էլ իրենք են համոզում քաղաքացիներին ունենալ այդ Սահմանադրությունը»,- ասաց իշխանական պատգամավորը։

Մեր հարցին՝ արդյոք ընդդիմությանը համոզելու մեխանիզմների թվում քրեական հետապնդումներ կարող են լինել, Հակոբյանը պատասխանեց, որ դրանք եղել են և կլինեն այն անձանց նկատմամբ, որոնց կողմից ենթադրյալ հանցավոր արարք է կատարվել։

«Չես կարող մարդու վրա ուղղակի գործ կարել։ Հասկանո՞ւմ եք, այդ ամեն ինչը մերժվել է 2018 թվականին»,- ընդգծեց նա։

Նրա խոսքով՝ ընդդիմությանը համոզելու իշխանության պատկերացրած ճանապարհը քննարկումներն են, նրանց հուզող հարցերին պատասխանելը և քաղաքական համոզումը։

«Եթե նույն կերպ չկարողանանք համոզել, որ իրենք սխալ են, իրենց ցանկությունները խնդիր է մեր պետականության համար, ուրեմն դա կբացատրվի ժողովրդին, և ժողովուրդը դա շատ սիրուն ձևով կբացատրի այսօրվա ընդդիմությանը»,- նշեց իշխանական պատգամավորը։

Հիշեցնենք, որ Նիկոլ Փաշինյանն ընտրություններից առաջ շատ իրատեսական էր համարել, որ ՔՊ-ն կստանա սահմանադրական մեծամասնություն, սակայն նրա այս կանխատեսումը չիրականացավ։ Եվ հիմա ՔՊ-ին հանրաքվե անցկացնելու համար անհրաժեշտ է ընդդիմադիր պատգամավորների աջակցությունը։

Հարցազրույցն ամբողջությամբ՝ տեսանյութում։

Արփի Հակոբյան