06.08.2026 | 15:35
Սալահը դարձել է Թուրքիայի ամենաբարձր վարձատրվող ֆուտբոլիստը. ավելի շատ աշխատավարձ, քան «Լիվերպուլում»
ԱԳՆ-ն 1 մլն դոլար կծախսի ՀՀ Անկախության օրվա առթիվ
Քաղաքականություն
06.08.2026 | 08:32
Հայաստանի անկախության 35-ամյակի շրջանակում արտերկրում ՀՀ դիվանագիտական ներկայացուցչությունները նախատեսում են անցկացնել միջոցառումների շարք, որոնց ընդհանուր ծախսը, նախնական հաշվարկով, կկազմի շուրջ 1 մլն ԱՄՆ դոլար։
Արտաքին գործերի նախարարության ներկայացրած նախագծի համաձայն՝ միջոցառումներ կկազմակերպվեն օտարերկրյա պետություններում գործող ՀՀ 51 դիվանագիտական ներկայացուցչություններում։ Դրանք կներառեն պաշտոնական ընդունելություններ, համերգներ, ցուցահանդեսներ, գրքերի և լուսանկարների, ֆիլմերի ցուցադրություններ, գիտաժողովներ ու թեմատիկ քննարկումներ։
Միջոցառումների ընթացքում նախատեսվում է ներկայացնել Հայաստանի պատմությունը, մշակութային ժառանգությունը, ժամանակակից ձեռքբերումները, խաղաղության օրակարգը, ինչպես նաև երկրի զբոսաշրջային և ներդրումային հնարավորությունները։ Կներկայացվեն նաև հայկական խոհանոցը, գինեգործությունն ու հայրենական արտադրանքը։
ԱԳՆ-ի հաշվարկով՝ ծրագրերի իրականացման համար անհրաժեշտ գումարը կտրամադրվի նախարարության ներքին միջոցների վերաբաշխման միջոցով։ Մասնավորապես, առաջարկվում է 260 մլն դրամ տեղափոխել «ՀՀ քաղաքացիների իրավունքների և շահերի պաշտպանություն» ծրագրից՝ «Օտարերկրյա պետություններում և միջազգային կազմակերպություններում հավատարմագրված ՀՀ դիվանագիտական ծառայության մարմինների գործունեության իրականացում» ծրագրին։
Նշված միջոցառման համար գումար էր նախատեսվել Մերձավոր Արևելքում ռազմական գործողությունների և անվտանգային իրավիճակի պատճառով Հայաստան վերադարձող ՀՀ քաղաքացիների ավիատոմսերի փոխհատուցման նպատակով։ Սակայն, ԱԳՆ-ի տվյալներով, փաստացի դիմումների հիման վրա ծախսվել է շուրջ 140 մլն դրամ, և ծրագրում առկա է չօգտագործված մնացորդ։
Մնացած ֆինանսական միջոցները ևս նախատեսվում է ապահովել ԱԳ նախարարության բյուջետային հատկացումների հաշվին։
Նարեկ Կիրակոսյան
