Հայ գերի Լյուդվիգ Մկրտչյանի վիճակը վատթարացել է․ փաստաբանը դիմել է Ալիևին

Բաքվում ապօրինի պահվող հայ ռազմագերի Լյուդվիգ Մկրտչյանի առողջական վիճակը վատթարացել է։ Այս մասին հայտնում է փաստաբան Լուսիանա Մինասյանը։ Փաստաբանը դիմել է Ադրբեջանի նախագահ Իլհամ Ալիևին:

«Լյուդվիգ Մկրտչյանը կնոջ հետ չի խոսել մեկ ամսից ավելի։ Վերջին անգամ Հրանուշ Շահբազյանն ամուսնու ձայնը լսել է հունիսի 19-ին։ Այդ զանգի ժամանակ Լյուդվիգը նրան ասել է, որ այնքան թույլ է զգացել, որ ուշաթափվել է։ Նրան տարել են սրտի ստուգման… և հետո ոչինչ։ Ոչ մի ախտորոշում։ Ոչ մի բացատրություն։ Եվ այդ ժամանակվանից ի վեր լիակատար լռություն է»,- նշել է Մինասյանը։

Նա ընդգծել է, որ 56-ամյա տղամարդն արդեն գրեթե վեց տարի անցկացրել է Բաքվի բանտում։

Մկրտչյանի վերջին բժշկական ստուգման եզրակացությունները մտահոգիչ են ՝ լեյկոցիտների քանակը գրեթե կրկնապատիկ է  նորմայից, տարածված բորբոքում, սրտի ծանր վնասվածք (ձախ փորոքի հիպերտրոֆիա, դիաստոլիկ դիսֆունկցիա, աորտայի անբավարարություն)։

«Նրա վիճակը վատթարանում է։ Նրա ընտանիքն անհայտության մեջ է։ Եվ դեռ ոչ մի հեռախոսազանգ։ Մեկ զանգը նրան չի ազատի, այն չի բուժի։ Բայց դա կնոջը թույլ կտա իմանալ՝ արդյո՞ք իր ամուսինը դեռ ողջ  է և գիտակից։ Դա մարդկային արժանապատվության բացարձակ նվազագույնն է։ Ես անհապաղ և հրապարակավ դիմում եմ Ադրբեջանի իշխանություններին. պարո՛ն նախագահ Ալիև, թույլ տվեք Լյուդվիգ Մկրտչյանին անհապաղ զանգահարել իր կնոջը՝ Հրանուշ Շահբազյանին»,- ահազանգել է փաստաբանը։

Թարգմանությունը՝ Էմմա Չոբանյանի