Թեհրանը հայտարարել է, որ ԱՄՆ-ը հարվածել է Բուշերի ԱԷԿ-ի մերձակայքին

Հորդանանում օդային հարձակման տագնապի ազդանշաններ են հնչել այն բանից հետո, երբ իրանական հրթիռները խախտել են երկրի օդային տարածքը, հայտնում են երկրի իշխանությունները։ Կառավարության խոսնակը հայտարարել է, որ բոլոր հրթիռները «որսացել և վնասազերծել են»։

«Հորդանանի զինված ուժերը պատրաստ են դիմակայել թագավորության առջև ծառացած ցանկացած սպառնալիքի և գործադրում են բոլոր ջանքերը՝ երկրի և քաղաքացիների անվտանգությունը պաշտպանելու համար»,- գրել է Մոհամմադ Ալ-Մոմանին X-ում։

Հորդանանում ԱՄՆ դեսպանատունը նույնպես տեղեկացրել է միջադեպի մասին՝ նշելով, որ կվերանայի իրավիճակը և կտրամադրի թարմացումներ։ ԱՄՆ-ը զորքեր և ինքնաթիռներ է տեղակայել երկրում։

Մինչ այդ, ԱՄՆ զինված ուժերը հայտարարել են, որ հարվածել են Իրանի ափամերձ գծի երկայնքով 90 թիրախի։ Ի պատասխան՝ Իրանի Իսլամական հեղափոխության պահապանների կորպուսը հայտարարել է, որ թիրախավորել է Քուվեյթում և Բահրեյնում գտնվող ամերիկյան ռազմական բազաները, մինչդեռ իրանական բանակը հայտարարել է, որ հարվածել է Կատարում գտնվող ամերիկյան ռազմական օբյեկտին։

Միաժամանակ, ԱՄՆ ուժերը հինգշաբթի կեսօրին մոտ հարվածներ են հասցրել Իրանի ափամերձ Բուշեր նահանգի մի քանի վայրերի, հաղորդում է Իրանի պետական ​​լրատվական գործակալությունը՝ IRNA-ն։

Բուշերի փոխնահանգապետ Էհսան Ջահանիանը հայտնել է, որ հարված է հասցվել նաև Բուշերի ատոմակայանի մերձակայքին։

ԱՄՆ զինված ուժերը հինգշաբթի օրվավա ընթացքում Իրանին ուղղված նոր հարվածների մասին չեն հայտնել։

Թարգմանությունը՝ Էմմա Չոբանյանի