08.07.2026 | 14:18
ՔԿ նախագահը ժամացույց է նվիրել ՊՊԾ պետին
Կիևում և Խարկովում ռուսական հարձակման հետևանքով զոհեր կան, տուժել է ավելի քան 20 մարդ
Քաղաքականություն
08.07.2026 | 12:28
Հուլիսի լույս 8-ի գիշերը ռուսական ուժերն Ուկրաինայի վրա արձակել են երկու X-31 П հրթիռ, հինգ «Իսկանդեր-Մ» բալիստիկ հրթիռ և 169 հարվածային անօդաչու թռչող սարք։ Ուկրաինայի ռազմաօդային ուժերի տվյալներով՝ ուկրաինական ուժերը խոցել են այդ անօդաչու թռչող սարքերից 139-ը, գրում է Current time-ը։
Կիև
Կիևում հրթիռային հարվածի հետևանքով մեկ կին զոհվել է, երկու վիրավոր կա։ Ուկրաինայի արտակարգ իրավիճակների պետական ծառայության տվյալներով՝ Սվյատոշինսկի շրջանում այրվել են վարչական շենք, պահեստներ, իսկ Դեսնյանսկի շրջանում՝ պահեստներ։
Խարկով
Խարկովում Նեմիշլյանսկի շրջանի բնակելի շենքի վրա հրթիռային հարվածի հետևանքով երկու մարդ է զոհվել, հայտարարել է քաղաքապետ Իգոր Տերեխովը։ Նա հավելել է, որ առավոտյան հարձակումների հետևանքով վիրավորվել է ավելի քան 20 մարդ։
Օդեսայի մարզ
Օդեսայի տարածաշրջանային ռազմական վարչակազմի ղեկավար Օլեգ Կիպերը հայտնել է, որ Ռուսաստանը զանգվածային հարված է հասցրել քաղաքացիական ենթակառուցվածքներին: Վնասվել են տարածաշրջանի հարավային մասում գտնվող երեք բենզալցակայաններ և էներգետիկ ենթակառուցվածքների մեկ օբյեկտ: Վիրավորներ չկան:
Միաժամանակ, Օդեսայում երեկոյան հարձակման զոհերի թիվը հասել է 11-ի: 9 մարդ հոսպիտալացվել է, նրանցից 48-ամյա տղամարդու վիճակը շարունակում է մնալ ծանր:
Դնեպրոպետրովսկի մարզ
Նիկոպոլի շրջանում վնասվել են գյուղատնտեսական ձեռնարկություններ, բենզալցակայաններ և տրանսպորտային միջոցներ։ Վիրավորվել է չորս մարդ։ Պավլոգրադում վնասվել է տրանսպորտային ենթակառուցվածք, իսկ Կրիվոյ Ռոգի շրջանում այրվել են ցորենի դաշտեր, հայտնել է ռազմական վարչակազմի ղեկավար Ալեքսանդր Գանժան։
Չեռնիգովի մարզ
Կորյուկովսկի շրջանում մեկ ձեռնարկությունում հրդեհվել է շենք, մյուսում՝ մեքենա և տրակտոր։ Արտակարգ իրավիճակների պետական ծառայության համաձայն՝ տուժածներ չկան։
Թարգմանությունը՝ Էմմա Չոբանյանի
