05.11.2026 | 23:32
Հայաստան-Լիտվա համագործակցություն․ Վահան Կոստանյանը աշխատանքային այցով մեկնել է Վիլնյուս
ՌԴ-ն զանգվածային հարված է հասցրել Կիևին․ զոհվել է 11, վիրավորվել՝ 56 մարդ
Քաղաքականություն
02.07.2026 | 10:42
Ռուսական զորքերը հուլիսի լույս 2-ի գիշերը լայնածավալ հարված են հասցրել Կիևին։ Վերջին տեղեկությունների համաձայն՝ զոհվել է 11 մարդ, վիրավորվել՝ 56-ը, գրում է Current time-ը։
Կիևի քաղաքային ռազմական վարչակազմի ղեկավար Տիմուր Տկաչենկոն հայտնել է, որ հարձակման հետևանքով քաղաքի ավելի քան 30 վայրերում ավերածություններ են։
Ուկրաինայի արտակարգ իրավիճակների պետական ծառայության տվյալներով՝ վնասվել է ավելի քան 20 բնակելի շենք, փրկարարները դեռևս աշխատում են 15 վայրերում։ Դարնիցկի շրջանում մասամբ ավերվել են հինգ և ինը հարկանի բնակելի շենքեր, 16 հարկանի շենքի վերին հարկերը և մասնավոր տներ։ Շևչենկովսկի շրջանում այրվել է յոթ հարկանի բնակելի շենքի և հյուրանոցի տանիք, վնասվել է հինգ հարկանի շենք։
Գոլոսեևսկի շրջանում հրդեհ է բռնկվել 16 հարկանի շենքի տեխնիկական հարկում, Պեչորսկի շրջանում ինը հարկանի շենք է ավերվել, Օբոլոնսկի շրջանում հրդեհ է բռնկվել պահեստի տարածքում, Սվյատոշինսկի շրջանում երկու մասնավոր բնակելի շենք է տուժել։
Ռուսաստանի Պաշտպանության նախարարությունը հայտարարել է, որ հարված է հասցրել Ուկրաինային՝ «ի պատասխան ուկրաինական կողմի կողմից քաղաքացիական ենթակառուցվածքների վրա հարձակումների»։
«Հեռահար օդային, ցամաքային և ծովային բազավորման զենքի, ինչպես նաև անօդաչու թռչող սարքերի կիրառմամբ հարվածի արդյունքում վնասվել են Կիևի և Կիևի մարզի ռազմարդյունաբերական համալիրը և վառելիքաէներգետիկ օբյեկտները, ինչպես նաև Դնեպրոպետրովսկի, Պոլտավայի, Չերկասիի, Չեռնիգովի և Կիևի մարզերի ռազմական օդանավակայանների ենթակառուցվածքները»,- պնդել է նախարարությունը։
Հուլիսի 1-ի երեկոյան Ուկրաինայի նախագահ Վլադիմիր Զելենսկին, հղում անելով հետախուզության տվյալներին, հայտարարել էր Ուկրաինայի վրա հնարավոր «ռուսական զանգվածային հարվածի» մասին։
Թարգմանությունը՝ Էմմա Չոբանյանի
