Առաջին ատյանի դատարանը ճնշումների ներքո է Քոչարյանին կալանավորել, դա ապացուցվում է նաև ԱԱԾ տնօրենի և ՀՔԾ պետի խոսակցության գաղտնալսումով․ Հայկ Ալումյան․ ՏԵՍԱՆՅՈՒԹ

Վերաքննիչ դատարանն այսօր քննում է Ռոբերտ Քոչարյանի 3 պաշտպանների վերաքննիչ բողոքը։

Ընդմիջումից հետո քննվելու է պաշտպաններից Հայկ Ալումյանի բողոքը։

Այնուհետ դատախազներն առարկություններ կներկայացնեն դրանց վերաբերյալ։

Քոչարյանի պաշտպաններն այսօր չեն հասցրել ներկայացնել միջնորդություններ, քանի որ դատարանը նախընտրել է նախ լսել նրանց բողոքները։
Հայկ Ալումյանն անդրադարձավ նոր վերաքննիչ բողոքին, որն իրենք ներկայացրել են։

Ըստ նրա՝ հուլիսի 27-ին Առաջին ատյանի դատարանը ճնշումների ներքո է Քոչարյանին կալանավորել, ինչն ապացուցվում է նաև ԱԱԾ տնօրենի և ՀՔԾ պետի խոսակցության գաղտնալսումով։

Այդ խոսակցությունից ստացվում է, որ կալանավորման միջնորդությունը ներկայացված է եղել ոչ թե, օրինակ կանխելու անձի փախուստը, այլ անձանց ցուցմունք տալ ստիպելու նպատակով։

Պաշտպանը նաև նշեց, որ գաղտնալսված հեռախոսազրույցը իրենք փորձում են ծառայեցնել հօգուտ Ռոբերտ Քոչարյանի։

Նշենք, որ Ռ․ Քոչարյանի պաշտպանների 3 բողոքներից մեկն ունի այսպիսի բովանդակություն․ ըստ Հայկ Ալումյանի՝ որպեսզի Առաջին ատյանի դատարանն իրավունք ունենար Ռոբերտ Քոչարյանին կալանավորել, նախ պետք է ապացուցված համարեր, որ Մարտի 1-ի գործով Քոչարյանը պիտի չօգտվի անձեռնմխելիության իրավունքից.

«Եթե ապազուցվեր, որ անձեռնմխելիությունից չի օգտվում, դրանից հետո պետք է քննարկեր՝ արդյո՞ք առկա է հիմնավոր կասկած, որ Քոչարյանը կատարել է իրեն մեղսագրվող հանցագործությունները»,-ասաց նա։

Մանրամասները՝ տեսանյութում։