Մոնակոյում բնակելի շենքում պայթյուն է որոտացել․ ուկրաինացի գործարար է վիրավորվել

Ուկրաինացի օլիգարխ, գործարար Վադիմ Երմոլաևն ու ևս երկու մարդ է վիրավորվել Մոնակոյի բնակելի շենքում տեղի ունեցած հզոր պայթյունի հետևանքով, հաղորդում է AFP-ը, գրում է DW-ի ռուսական ծառայությունը։

Մոնակոյի իշխանությունների հաղորդմամբ՝ հունիսի 29-ի երեկոյան Մոնտե Կառլոյում ռումբով պայուսակի պայթյունը տեղի է ունեցել Մուլենի հրապարակի մոտ։ Եերկու մեծահասակներ ստացել են կյանքի համար վտանգավոր  վնասվածքներ, իսկ 13-ամյա մի երեխա՝ թեթև վնասվածքներ:

Երեքն էլ տեղափոխվել են Ֆրանսիայի Նիս քաղաքի հիվանդանոցներ, որոնք գտնվում են միջադեպի վայրից 20 կիլոմետր հեռավորության վրա։

Քննչական մարմինների իրազեկ աղբյուրը AFP-ին հաստատել է, որ տուժածներից մեկը Երմոլաևն է՝ Մոնակոյում բնակվող ուկրաինացի գործարար: Այս մասին հայտնել են նաև մի քանի ուկրաինական լրատվամիջոցներ՝ հղում անելով իրենց սեփական աղբյուրներին: Այս տեղեկությունը պաշտոնապես հաստատված չէ:

Տեղական իշխանությունների տվյալներով՝ տեսախցիկները ֆիքսել են, թե ինչպես է կասկածյալը պայթյունից առաջ բնակելի շենքի նախասրահում թողել պայուսակ կամ տուփ, որը պարունակում էր պայթուցիկ սարք, ապա ոտքով փախել Ֆրանսիայի ուղղությամբ։ Մոնակոյից ելքերն արգելափակված են։

Պայթյունի պատճառը և միջադեպի նախապատմությունը քննվում են։ Մոնակոյի վարչապետ Քրիստոֆ Միրմանը նախ հայտարարել է, որ դա, հավանաբար, ահաբեկչական հարձակում է եղել, սակայն ավելի ուշ փոխել է հայտարարությունը և միջադեպն անվանել «դիտավորյալ պայթյուն»: Նրա խոսքով՝ սա Մոնակոյի պատմության մեջ առաջին նման միջադեպն է։

Հետաքննության նախնական արդյունքները, ինչպես սպասվում է, կհրապարակվեն հունիսի 30-ին։

2021 թվականին Forbes-Ուկրաինան գործարար և ներդրող Վադիմ Երմոլաևին ներառել էր 100 ամենահարուստ ուկրաինացիների իր ցանկում՝ գնահատելով նրա կարողությունը 220 միլիոն դոլար: 2019 թվականին նա հրաժարվել է Ուկրաինայի քաղաքացիությունից և ստացել Կիպրոսի քաղաքացիություն: 2023 թվականին Կիևն անձնական պատժամիջոցներ է սահմանել Երմոլաևի դեմ:

Թարգմանությունը՝ Էմմա Չոբանյանի