Ադրբեջանում բանտարկված քաղակտիվիստները նամակ են հղել ԵՀ նախագահին՝ Ադրբեջան այցի ընթացքում քննարկել մարդու իրավունքներին վերաբերող հարցեր

Եվրահանձնաժողովի նախագահ Ուրսուլա ֆոն դեր Լայենը հուլիսի 1-ին կժամանի Ադրբեջան: Այս կապակցությամբ Ադրբեջանում բանտարկված մի խումբ քաղաքական ակտիվիստներ և հասարակական գործիչ, ընդդիմադիր ակտիվիստ Բախտիյար Հաջիևը բանտից նամակ են հղել ԵՀ նախագահին, գրում են ադրբեջանական լրատվամիջոցները։

Նամակի հեղինակները ողջունում են վերջին ժամանակներում Եվրամիության և Ադրբեջանի միջև նկատվող դրական դինամիկան։ Էներգետիկայի, տրանսպորտի, տնտեսական համագործակցության և տարածաշրջանային կայունության նման ոլորտներում հարաբերությունների զարգացումը դրական գործընթաց է, որը ծառայում է երկու կողմերի շահերին և ստեղծում է կարևոր հնարավորություններ երկարաժամկետ գործընկերության համար։

«Միևնույն ժամանակ, մենք կարծում ենք, որ Եվրամիության և Ադրբեջանի միջև կայուն, հուսալի և երկարաժամկետ հարաբերությունները չպետք է հիմնված լինեն միայն ռազմավարական և տնտեսական շահերի վրա: Մարդու իրավունքների, օրենքի գերակայության և հիմնարար ազատությունների նկատմամբ հարգանքը պետք է լինի այս համագործակցության անբաժանելի և հիմնարար հենասյունը։ Ադրբեջան կատարելիք Ձեր նախատեսված այցից առաջ մենք կոչ ենք անում Ձեզ մարդու իրավունքների հարցերը պահել Ադրբեջանի ղեկավարության հետ քննարկումների կենտրոնում: Հուսով ենք, որ Եվրամիությունը հստակ և սկզբունքային կոչ կանի Ադրբեջանում պահվող բոլոր քաղբանտարկյալների անհապաղ և անվերապահ ազատ արձակման համար, միաժամանակ, ընդգծելով երկրում հիմնարար իրավունքներն ու ազատությունները ապահովելու համար իրական քայլեր ձեռնարկելու կարևորությունը»,- ասվում է հայտարարությունում։

Նրանք նաև հույս են հայտնել, որ ի տարբերություն բարձր մակարդակի նախորդ այցելությունների՝ այս անգամ այցի ծրագիրը կներառի հանդիպումներ անկախ լրագրողների, բլոգերների, մարդու իրավունքների պաշտպանների և քաղաքացիական հասարակության ներկայացուցիչների հետ, ովքեր դեռևս շարունակում են իրենց գործունեությունը մեծ դժվարությունների և ռիսկի պայմաններում։

Նշվում է, որ նման հանդիպումները կցույց տան Եվրամիության հանձնառությունը ոչ միայն ռազմավարական գործընկերությանը, այլև դրա հիմքում ընկած հիմնարար արժեքներին, ինչպիսիք են մարդու իրավունքները, ժողովրդավարությունը և օրենքի գերակայությունը: Այն նաև կարևոր բարոյական աջակցություն կցուցաբերի Ադրբեջանում նրանց, ովքեր խաղաղ և օրինական կերպով գործում են իրենց իրավունքների և ազատությունների համար։

«Մենք կարծում ենք, որ իսկապես կայուն և հուսալի համագործակցությունը հնարավոր է միայն այն դեպքում, երբ այն հիմնված է ոչ միայն փոխադարձ շահերի, այլև ընդհանուր արժեքների և մարդու իրավունքների նկատմամբ հարգանքի վրա։ Հուսով ենք, որ Ձեր այցի ընթացքում մարդու իրավունքների հարցը կբարձրացվի որպես Եվրոպական Միության և Ադրբեջանի միջև համագործակցության անբաժանելի մաս, և որ Դուք կցուցաբերեք հստակ, սկզբունքային դիրքորոշում այս հարցի վերաբերյալ»,- ասվում է նամակում։

Թարգմանությունը՝ Էմմա Չոբանյանի