24.06.2026 | 20:37
Քննարկվել են ՎԶԵԲ-ի հետ իրականացվող ծրագրերն ու նոր նախաձեռնությունների հնարավորությունները
Մակրոնը Փաշինյանին ավելի քան 1,5 մլն դրամ արժողությամբ նվերներ է տվել
Հասարակություն
24.06.2026 | 11:30
Ֆրանսիայի նախագահ Էմանուել Մակրոնը ՀՀ վարչապետ Նիկոլ Փաշինյանին ավելի քան 1,5 մլն դրամ ընդհանուր արժողությամբ նվերներ է տվել։ Այս մասին Factor.am-ը տեղեկանում է վարչապետի՝ Կոռուպցիայի կանխարգելման հանձնաժողով ներկայացրած նվերների հաշվառման ձևաթղթից։
Ֆրանսիայի նախագահ Էմանուել Մակրոնը Հայաստան էր ժամանել երկօրյա պետական այցով։ Այցի շրջանակում նա Երևանում մասնակցեց Եվրոպական քաղաքական համայնքի (EPC) 8-րդ գագաթնաժողովին։
Մայիսի 4-ին ՀՀ նախագահ Վահագն Խաչատուրյանի և վարչապետ Նիկոլ Փաշինյանի անունից՝ ի պատիվ Ֆրանսիայի նախագահի, նախագահական նստավայրում կազմակերպվել էր պետական ընթրիք։ Դրա ընթացքում Մակրոնը Փաշինյանին նվիրել է Ֆրանսիայի Հանրապետության Պատվո լեգեոնի Մեծ խաչ շքանշանը, որի արժեքը գնահատվել է 1 մլն 265 հազար դրամ։
Վարչապետը նույն օրը ստացել է ևս մեկ նվեր՝ Մինաս Բժշկյանի «Ճեմարան գիտելեաց» աշխատությունը, որը հրատարակվել է 1818 թվականին Վենետիկում։ Գրքի արժեքը գնահատվել է 308 հազար դրամ։
Հիշեցնենք, որ «Հանրային ծառայության մասին» օրենքում կատարված փոփոխությունների արդյունքում սահմանվել են հանրային ծառայողների կողմից նվերներ ընդունելու վերաբերյալ կանոններ։ Ըստ այդ կարգավորումների՝ պետությանը կամ համայնքին են հանձնվում պետական, պաշտոնական այցերի, միջոցառումների, ինչպես նաև աշխատանքային այցերի, գործուղումների շրջանակում տրվող նվերները, եթե դրանց արժեքը գերազանցում է 60,000 ՀՀ դրամը:
Անի Թամրազյան
