Իրանի գերագույն առաջնորդը հայտարարել է, որ հավանություն է տվել ԱՄՆ-ի հետ գործարքին՝ չնայած տարբեր տեսակետ ունենալուն

Իրանի գերագույն հոգևոր առաջնորդ Մոջթաբա Խամենեին հայտարարել է, որ հավանություն է տվել Միացյալ Նահանգների հետ Մերձավոր Արևելքում պատերազմը դադարեցնելու համաձայնագրին՝ չնայած «տարբեր տեսակետ» ունենալուն՝ առանց մանրամասնելու, գրում Al Arabiya-ն՝ վկայակոչելով AFP-ին։

«Սկզբունքորեն ես այլ տեսակետ ունեի [փոխըմբռնման հուշագրի վերաբերյալ], բայց ես տվել եմ իմ թույլտվությունը՝ պայմանավորված այն պարտավորությամբ, որը պատվարժան [Իրանի] նախագահը, որպես Գերագույն ազգային անվտանգության խորհրդի նախագահ, իր և մյուս անդամների անունից տվել է ինձ՝ պաշտպանելու Իրանի ազգի և Դիմադրության ճակատի իրավունքները»,- նշել է Խամենեին պետական ​​հեռուստատեսությամբ ընթերցված ուղերձում։

Խամենեին հանրությանը չի ներկայացել մարտին պաշտոնը ստանձնելուց ի վեր, երբ սպանվեց նրա հայրը՝ Ալի Խամենեին, փետրվարի 28-ին Իրանի վրա ԱՄՆ-Իսրայել հարվածների հետևանքով, որոնք էլ հանգեցրին տարածաշրջանային պատերազմի։ Այս ուղերձը նրա առաջին արձագանքն էր ԱՄՆ նախագահ Դոնալդ Թրամփի և Իրանի նախագահ Մասուդ Փեզեզքիանի կողմից ստորագրված հակամարտությունը դադարեցնելուն ուղղված Իրան-ԱՄՆ համաձայնագրին։

Խամենեին ասել է, որ Թրամփն «օգտագործել է բոլոր տեսակի լծակները»՝ «հուսահատությունից դրդված» համաձայնագիրն ապահովելու համար։ Իր ուղերձում Խամենեին նշել է, որ Փեզեշքիանից ստացել է համաձայնագրի վերաբերյալ հավաստիացումներ, և որ այն չի ընդունվի, «եթե ամերիկյան կողմը ցանկանա չափազանց պահանջներ ներկայացնել»։

«Ակնհայտ է, որ ապագայում կայանալիք դեմ առ դեմ բանակցությունները չեն նշանակի թշնամու տեսակետի ընդունում», – հավելել է նա։

Միևնույն ժամանակ, ԱՄՆ փոխնախագահ Ջեյ Դի Վենսը պաշտպանել է գործարքը՝ ասելով, որ, հավանաբար, կմեկնի Շվեյցարիա՝ հուշագիրը երկարաժամկետ համաձայնագրի վերածելու բանակցությունների համար։

«Իրանցիները պետք է կատարեն իրենց պարտավորությունները։ Եթե նրանք չկատարեն այն, ինչ մենք արդեն ասել ենք, ապա նրանք չեն ստանա գործարքի որևէ առավելություն»,- Սպիտակ տանը կայացած ճեպազրույցի ժամանակ ասել է Վենսը։

Նա հերքել է պնդումները, որ գործարքը պարգևատրում է Իրանին՝ առանց նախագահ Դոնալդ Թրամփի պատերազմական նպատակներին հասնելու։

Ամենավիճահարույց կետերը վերաբերում էին նավթի վաճառքին, պատժամիջոցների մեղմացմանը և Իրանի համար 300 միլիարդ դոլարի երակառուցման հիմնադրամին, մինչդեռ Իրանի միջուկային գործունեությունը ոչնչացնելու հստակ ծրագիր չկա։ Սակայն Վենսն ասել է, որ Իրանը կստանա պարգևատրումները միայն այն դեպքում, եթե ապացուցի, որ կատարել է այն պայմանները, որոնք կմշակվեն 60-օրյա ժամկետում, որը, նրա խոսքով, սկսվել է փոխըմբռնման հուշագրի  ստորագրումից հետո։

Վենսն ասել է, որ այժմ ծրագրում է մեկնել Շվեյցարիա՝ երկարաժամկետ համաձայնագրի վերաբերյալ տեխնիկական բանակցություններ վարելու համար, չնայած պայմանավորվածությունները դեռևս  չեն վերջնականացվել։

«Ես ծրագրում եմ մեկնել Շվեյցարիա։ Կարծում եմ՝ այս շաբաթավերջին, բայց վստահ չեմ։ Ամեն ինչ կախված է նրանից, թե երբ իրանցիները կկարողանան հասնել այնտեղ»,- ասել է Վենսը։