03.08.2026 | 17:00
2 փոխվարչապետները վերանշանակվեցին իրենց պաշտոններում
Ոչ մի երկիր չի՞ աջակցել Կարապետյանին․ պնդումներ և իրականություն․ ՏԵՍԱՆՅՈՒԹ
Քաղաքականություն
18.06.2026 | 20:00
Նկարը մշակվել է ԱԲ օգնությամբ
«Մեր հետևում չկան պետություններ. դուք բոլորդ տեսաք՝ նախընտրական փուլում ոչ մի պետություն չարեց հայտարարություն մեր օգտին»,- մի քանի լրատվամիջոցների խմբագիրների հետ հարցազրույցի ընթացքում հայտարարել է «Ուժեղ Հայաստան» կուսակցության առաջնորդ Սամվել Կարապետյանը։
Նա պնդել է, որ իր ուժը չի առաջնորդվում արտաքին աջակցությամբ և չի գործում որևէ պետության հովանու ներքո։ Սակայն նախընտրական շրջանի զարգացումները հարցեր են առաջացնում՝ արդյո՞ք այս պնդումն ամբողջությամբ համապատասխանում է իրականությանը։
Այդ համատեքստում ուշադրության արժանի է հատկապես Նիկոլ Փաշինյան-Վլադիմիր Պուտին վերջին հանդիպումը, որը տեղի է ունեցել ապրիլի 1-ին Մոսկվայում։ ՀՀ վարչապետը պաշտոնական այցով մեկնել էր Ռուսաստանի մայրաքաղաք, որի հանդիպման ընթացքում ՌԴ նախագահը անդրադարձել էր Հայաստանում նախատեսված խորհրդարանական ընտրություններին։
Պուտինի ուղերձը բավական հստակ էր։ Նա, ըստ էության, բաց տեքստով հորդորել էր չխոչընդոտել ռուսամետ ուժերի մասնակցությունը ընտրապայքարին։
«Մենք շատ կցանկանայինք, որ այս բոլոր քաղաքական կուսակցությունները, քաղաքական գործիչները կարողանային մասնակցել այս ներքաղաքական աշխատանքին՝ ընտրությունների ընթացքում։ Ոմանք, գիտեմ, գտնվում են ազատազրկման վայրերում, չնայած այն հանգամանքին, որ ունեն Ռուսաստանի անձնագիր։ Դա Ձեր որոշումն է, մենք չենք միջամտում, բայց կցանկանայինք, որ նրանք, առնվազն, կարողանային մասնակցել այս ներքաղաքական գործընթացին»,- ասել էր ՌԴ նախագահը։
Այդ պահին Սամվել Կարապետյանն արդեն գտնվում էր ոչ թե քրեակատարողական հիմնարկում, այլ տնային կալանքի տակ։ Այդուհանդերձ, ընդդիմադիր դաշտի առաջնորդներից հենց նա է այն գործիչը, որի Ռուսաստանի քաղաքացիություն փաստը հայտնի է հանրությանը։ Այս հանգամանքը Պուտինի հայտարարությունը դարձնում է առավել հասցեական՝ նույնիսկ եթե նրա խոսքում Կարապետյանի անունը ուղղակիորեն չի նշվում։
ՀՀ վարչապետը պատասխանել էր․ «Ռուսական անձնագիր ունեցող անձինք, Հայաստանի Հանրապետության Սահմանադրության համաձայն, չեն կարող լինել ո՛չ պատգամավորի թեկնածու, ո՛չ վարչապետի թեկնածու։ Այստեղ որևէ սահմանափակում չկա»։
Այսպիսով, Սամվել Կարապետյանի պնդումը, թե նախընտրական փուլում որևէ պետություն հայտարարություն չի արել իրենց օգտին, մանիպուլյատիվ է։ Թեև Ռուսաստանի նախագահը ուղղակիորեն չի նշել Սամվել Կարապետյանի կամ «Ուժեղ Հայաստան» կուսակցության անունը, նրա ապրիլի 1-ի հայտարարությունը փաստացի վերաբերում էր Հայաստանում ընտրություններին մասնակցելու հնարավորությունից զրկված ռուսական անձնագիր ունեցող քաղաքական գործիչներին։ Իսկ այդ շրջանակում Սամվել Կարապետյանը այդպիսի կարգավիճակում միակն էր։
Եվգենյա Համբարձումյան
