Քրեական գործերի քննության համար ողջամիտ ժամկետներ կսահմանվեն․ ԱՆ

Արդարադատության նախարարությունը շրջանառության մեջ է դրել օրենսդրական փոփոխությունների նախագիծ, որով առաջարկվում է քրեական գործերի դատաքննության համար սահմանել հստակ ժամկետներ։ Նախագծի համաձայն՝ քրեական գործերը պետք է քննվեն մեկ տարվա ընթացքում, իսկ ժամկետների անհիմն խախտումը կարող է հանգեցնել դատավորի կարգապահական պատասխանատվության։ Փոփոխություններով նախատեսվում են նաև մեխանիզմներ, որոնք միտված են դատական գործընթացների ձգձգումների կրճատմանը և քրեական դատավարության արդյունավետության բարձրացմանը։

«Արդարադատության նախարար Սրբուհի Գալյանը «Հայաստանի Հանրապետության քրեական դատավարության օրենսգրքում փոփոխություններ և լրացումներ կատարելու մասին» և «Հայաստանի Հանրապետության դատական օրենսգիրք» սահմանադրական օրենքում լրացում կատարելու մասին» օրենքների նախագծերը, որոնց նպատակն է բարձրացնել քրեական դատավարության արդյունավետությունը՝ միաժամանակ ապահովելով արդար դատաքննության հիմնարար սկզբունքների լիարժեք պահպանումը։

Առաջարկվում է նախատեսել դատաքննության հստակ ժամկետներ, մասնավորապես՝

✅քրեական գործը պետք է քննվի 1 տարվա ընթացքում,
✅գործի քննության երկարաձգման հնարավորություն` պատճառաբանված որոշմամբ ոչ ավելի, քան 2 անգամ, յուրաքանչյուր դեպքում առավելագույնը 1 տարի ժամկետով,
✅ ժամկետի խախտումը հանգեցնելու է դատավորի կարգապահական պատասխանատվության ,
✅նախատեսել դատավորի փոխարինումից հետո դատական վարույթն ընդհատված պահից շարունակելու հնարավորություն՝ բացառելով դատավորների հաճախակի փոփոխությամբ պայմանավորված քրեական գործի տարիներ ձգվող քննությունը,
✅նախատեսել, որ դատավորի փոխարինման դեպքում մինչև դատական կազմի փոփոխությունը հետազոտված բոլոր ապացույցները համարվում են հետազոտված՝ բացառությամբ այն ապացույցների, որոնք կրկին հետազոտելը դատարանը համարում է անհրաժեշտ, միաժամանակ ապացույց հետազոտելու վերաբերյալ կողմի միջնորդությունը դատարանի համար պարտադիր է։
✅Կողմերի համաձայնությամբ ապացույցները հետազոտված համարելու հնարավորություն՝ առանց դրանք սահմանված կարգով հետազոտելու,
✅կողմերի համաձայնությամբ վկայի և փորձագետի ցուցմունքները հրապարակելու հնարավորություն՝ առանց նրանց դատարան կանչելու՝ գործի դատական քննությունը արագացնելու նպատակով:

Նախագծով առաջարկվող այս և մյուս փոփոխությունները նպատակ ունեն բարձրացնել քրեական դատավարության արդյունավետությունը՝ միաժամանակ ապահովելով արդար դատաքննության հիմնարար սկզբունքների լիարժեք պահպանումը»,- ասված է ՀՀ ԱՆ-ի տարածած հաղորդագրությունում։