26.09.2026 | 20:38
Քաղաքացին ընկել է ջրհորը. նա հոսպիտալացվել է
ՀՀ-ում ձերբակալված և 3 օր անազատության մեջ պահված ռուս մաթեմատիկոսին թույլատրել են լքել երկիրը. արտահանձնման պահանջ չի ներկայացվել
Հասարակություն
16.06.2026 | 15:55
Հունիսի 12-ին «Զվարթնոց» օդանավակայանում ձերբակալված, ապա 72 ժամ անց ազատ արձակված ռուս մաթեմատիկոս Միխայիլ Վերբիցկին կարողացել է լքել Հայաստանի Հանրապետությունը։ Այս մասին Factor TV-ի հետ զրույցում ասաց նրա փաստաբան Վաչե Սիմոնյանը։
«Իմ կողմից ներկայացված միջնորդության հիման վրա է վերջինիս թույլատրվել սահմանն անցնել, կիրառված արգելանքը բացվել է և Վերբիցկին անարգել հեռացել է Թել Ավիվ»,- ասաց նա։
Միխայիլ Վերբիցկին Հայաստան էր ժամանել հունիսի 12-ին և ձերբակալվել, քանի որ Ռուսաստանի Դաշնության կողմից հետախուզվողների ցուցակում է եղել։
«Օդանավակայանում Վերբիցկուն ասել են, որ ռուս իրավապահների կողմում գործ կա իր վրա ահաբեկչական գործունեություն իրականացնելու հրապարակային կոչերի, ահաբեկչությունը հրապարակայնորեն արդարացնելու կամ քարոզելու հոդվածներով։ Նախաձեռնողը եղել է Ռուսաստանի Դաշնությունը, Հայաստանի Հանրապետությունն ի կատարումն միջազգային իր պարտավորությունների, եղել է ուղղակի կատարող։ ՀՀ-ն տեսնելով, որ անձի նկատմամբ հետախուզում կա, ձերբակալել է, 72 ժամվա ընթացքում սպասում էինք, որ ՌԴ-ն արտահանձնման պահանջ է ներկայացնելու, սակայն, նման որևէ դիմում այդպես էլ չստացվեց, ինչի արդյունքում Վերբիցկին ազատ արձակվեց։ Սակայն դեռևս խնդիր կար երկիրը լքելու, թեև նա արդեն իսկ գնած տոմս ուներ դեպի Թել Ավիվ։ Ես միջնորդություն ներկայացրի արգելանքը հանելու, ինչն էլ, փաստացի, բավարարվեց»,- մանրամասնեց Սիմոնյանը։
Միխայիլ Վերբիցկին Մոսկվայում աշխատել է Տեսական և փորձարարական ֆիզիկայի ինստիտուտում, դասավանդել է Ազգային հետազոտական համալսարանի տնտեսագիտության բարձրագույն դպրոցի մաթեմատիկայի ամբիոնում, ինչպես նաև Գլազգոյի համալսարանում և բելգիական Ազատ համալսարանում: 2015 թվականից ապրում է Ռիո դե Ժանեյրոյում, Մաթեմատիկայի ազգային ինստիտուտի պրոֆեսոր է:
2025 թվականին ՌԴ-ն նրա նկատմամբ հետախուզում է հայտարարել ծանր մեղադրանքներով։ Նա նախագահ Վլադիմիր Պուտինի դեմ խոսող ակտիվ ընդդիմադիր գործիչներից է։
Ռոզա Վարդանյան
