Ուկրաինական ԱԹՍ-ները գրոհել են Մոսկվան․ հարված է հասցվել տեղի նավթավերամշակման գործարանին․ ՏԵՍԱՆՅՈՒԹ

Մոսկվայի քաղաքապետ Սերգեյ Սոբյանինը հայտնել է, որ հունիսի 16-ի առավոտյան ժամը 5-ից սկսած ՌԴ մայրաքաղաքին մոտենալիս ոչնչացվել է 60 անօդաչու թռչող սարք։ Մոսկվայի բոլոր չորս օդանավակայանները՝ «Շերեմետևո», «Դոմոդեդովո», «Վնուկովո» և «Ժուկովսկի», գիշերը փակվել են։ Սահմանափակումները վերացվել են առավոտյան, գրում է Meduza-ն։

Astra-ն, հղում անելով ականատեսներին, հաղորդում է, որ Մերձմոսկվայի Պավլովսկի Պոսադում գործել են հակաօդային պաշտպանության համակարգեր, քաղաքի վրա անօդաչու է խոցվել։ Անօդաչու թռչող սարքեր են խոցվել նաև Ռամենսկոյեում և Ժուկովսկիում։

Ուկրաինական Exilenova+ տելեգրամ ալիքը պնդում է, որ Մոսկվայի Կապոտնյա նավթավերամշակման գործարանում անօդաչու թռչող սարքի հարձակումից հետո հրդեհ է բռնկվել։ Մոսկվայի իշխանությունները շուտով հաստատել են  նավթավերամշակման գործարանի վրա հարձակումը։ Սոբյանինը հայտնել է, որ անօդաչուներից մեկը վնասել է գործարանը։ Տուժածներ չկան։

Կրասնոդարի երկրամասի Պոլտավսկայա քաղաքի նավթաբազայում էլ հրդեհ է բռնկվել անօդաչու թռչող սարքի բեկորների ընկնելուց հետո: Տարածաշրջանի օպերատիվ շտաբը հայտարարել է, որ տուժածներ չկան: Պոլտավսկայա և Տրուդոբելիկովսկի միջև ընկած ճանապարհը փակվել է անօդաչուի հարվածի պատճառով:

Հունիսի լույս 16-ի գիշերը ՀՕՊ ուժերը Ռուսաստանի մարզերի և Ղրիմի վրա ոչնչացրել են ուկրաինական 172 անօդաչու թռչող սարք, հայտնել է ՌԴ Պաշտպանության նախարարությունը։

Անօդաչու թռչող սարքեր են խոցվել Աստրախանի, Բելգորոդի, Բրյանսկի, Կալուգայի, Կուրսկի, Վոլգոգրադի, Վորոնեժի, Օրյոլի, Տամբովի, Տուլայի, Ռոստովի և Ռյազանի մարզերի, Մոսկվայի մարզի, Կրասնոդարի երկրամասի, բռնակցված Ղրիմի, ինչպես նաև Ազովի ու Սև ծովերի վրա։

Թարգմանությունը՝ Էմմա Չոբանյանի