Մենք խնդիր ունենք, երբ ՔՊ-ի յուրաքանչյուր ձայն մեկից դառնում է զրո. Սուրեն Գրիգորյան․ ՏԵՍԱՆՅՈւԹ

«Ես առաջին անգամ ընտրել եմ 2013 թվականին, և դրանից հետո չի եղել մեկ ընտրություն, որում ընտրելու իրավունք եմ ունեցել ու չեմ գնացել տեղամաս: Հասկանու՞մ եք, ես մաշկով եմ տեսել այդ մեքենաները, որ մարդիկ նստում էին, խմբերով իջնում էին… իմ հետ մեր որոշ հարևաններ շփվելիս ասում էին՝ «եղբա՛յր, այսինչ մեկին պետք է ընտրել, որ մեր ընկերոջը բանից՝ էլի ազատազրկման վայրից բաց թողնեն»»,-այս մասին ԿԸՀ նիստից հետո Factor TV-ի հետ զրույցում նշեց Երևանի փոխքաղաքապետ, ՔՊ-ի լիազոր ներկայացուցիչ Սուրեն Գրիգորյանը։

«Եվ հիմա ինչքան էլ ինձ գան ասեն, որ այն ժամանակվա ոչ մի ուժի մեջ մտած որոշում չկա և այլն, ասում եմ՝ աչքի տեսածին չհավատա՞մ, ասեմ՝ «ինչ է՝ վճիռ չկա, լավ, ուրեմն չի եղել»: Հիմա նույնը այս ընտրությունների դեպքում է. բոլորս այդ ձայնագրությունները լսել ենք, այնքան մասսայական է եղել այդ պրոցեսը, որ մարդիկ մեկը մյուսին խոսելով պատմել են: Այսինքն՝ ես, օրինակ, այնպես չի, որ իմացել եմ այդ երևույթի մասին ձայնագրություններից. ինձ էլ են իմ ծանոթները, բարեկամները ասել՝ «եղբա՛յր, այսպիսի բան է տեղի ունենում, խաբա՞ր եք»։

Ու հիմա, որ բոլորիս աչքի առաջ է եղել, առնվազն ես կարծում եմ՝ ամեն մարդ գոնե մի հոգի ճանաչում է, որ այդ պրոցեսից փաստերով, դետալներով տեղյակ է: Հիմա այս մարդիկ ասում են՝ «անմեղության կանխավարկածը մի՛ խախտեք»։ Հասկացա՛նք, չենք խախտում. այ այսինչ մարդը պարտադիր պետք է քրեական պատասխանատվություն կրի: Բայց ասում ենք՝ այն, որ այս ընտրությունների շրջանակներում մասսայական այս երևույթը տեղի է ունեցել, չի ստացվելու ասել, որ վճիռ չկա, ուրեմն մոռացե՛ք, չեք լսել»,-ասաց նա։

Մանրամասները՝ տեսանյութում։