Երկու զինվորական դատախազի նկատմամբ կարգապահական տույժ է կիրառվել՝ գործերի հսկողության թերացումների համար

ՀՀ գլխավոր դատախազի որոշմամբ՝ Սիսիանի և Կապանի կայազորների զինվորական դատախազություններում ինքնավար պաշտոն զբաղեցնող երկու դատախազի նկատմամբ կարգապահական տույժեր են նշանակվել։ Էթիկայի հանձնաժողովը հաստատված է համարել, որ նրանք սահմանված ժամկետներում չեն պահանջել մի շարք քրեական վարույթներ և ժամանակին չեն կայացրել համապատասխան դատախազական ակտեր։ Սիսիանի կայազորի դատախազը ստացել է նկատողություն, իսկ Կապանի կայազորի դատախազի դասային աստիճանն իջեցվել է մեկ աստիճանով։

«2026 թվականի հունվարի 21-ին Սիսիանի կայազորի զինվորական դատախազությունում և Կապանի կայազորի զինվորական դատախազությունում ինքնավար պաշտոն զբաղեցնող 2 անձի նկատմամբ հարուցվել է կարգապահական վարույթ:

ՀՀ գլխավոր դատախազին առընթեր էթիկայի հանձնաժողովը 2026 թվականի հունիսի 10-ին կայացած նիստում 2 դատախազի գործողություններում հաստատված է համարել կարգապահական խախտման փաստի առկայությունը:

Մասնավորապես՝ դատախազները, պատասխանատու լինելով մինչդատական վարույթի օրինականության համար, մի շարք քրեական վարույթներ սահմանված ժամկետում չեն պահանջել վարույթն իրականացնող մարմնից և ժամանակին չեն կայացրել համապատասխան դատախազական ակտեր:

Գլխավոր դատախազի՝ 2026 թվականի հունիսի 12-ի որոշմամբ, Սիսիանի կայազորի զինվորական դատախազությունում ինքնավար պաշտոն զբաղեցնող անձի նկատմամբ նշանակվել է «նկատողություն» տեսակի կարգապահական տույժ. նվազ խստություն ունեցող կարգապահական տույժ է կիրառվել՝ հաշվի առնելով այն հանգամանքը, որ դատախազը, բացի իր հսկողության ներքո գտնվող քրեական վարույթների նկատմամբ հսկողությունից, ղեկավարել և կազմակերպել է Կապանի կայազորի զինվորական դատախազության գործունեությունը (նախկինում Կապանի կայազորի զինվորական դատախազությունում է զբաղեցրել ինքնավար պաշտոն):

Գլխավոր դատախազի՝ 2026 թվականի հունիսի 12-ի որոշմամբ, Կապանի կայազորի զինվորական դատախազությունում ինքնավար պաշտոն զբաղեցնող անձի նկատմամբ նշանակվել է «դասային աստիճանի իջեցում՝ մեկ աստիճանով» տեսակի կարգապահական տույժ»,- ասված է հաղորդագրւթյունում։